Польшча, Латвія, Літва, Славакія, Фінляндыя, Чэхія і Швецыя закрылі сваё неба для Беларусі. Хто яшчэ
Пасля захопу самалёта «Ryanair» у Беларусі 23 траўня шэраг краінаў адрэагаваў забаронай палётаў над Беларуссю або забаронай беларускім самалётам выкарыстоўваць сваю паветраную прастору.
Рашэнне Саміту Еўразвязу аб забароне беларускім авіякампаніям палётаў у Еўразвяз не ўхваленае канчаткова – яго яшчэ маюць зацвердзіць міністры краінаў альянсу. Міжнародная арганізацыя грамадзянскай авіяцыі склікае 27 траўня тэрміновае паседжанне праз сітуацыю ў Беларусі.
Аднак раней прымаць беларускія рэйсы самастойна адмовіліся Вялікая Брытанія і Францыя, а Ўкраіна спыніла ўсе авіяцыйныя зносіны з Беларуссю. Літва спачатку закрыла паветраную прастору для самалётаў, якія пралятаюць над Беларуссю і прылятаюць у Літву ці вылятаюць з яе і збіраюцца пралятаць над Беларуссю.
Абноўлена. Вечарам 26 траўня Рада міністраў Польшчы прыняла забарону на выкарыстанне паветранай прасторы для самалётаў беларускіх авіяперавознікаў.
Абноўлена. Пазней вечарам Славакія забараніла беларускім авіялініям выкарыстанне сваёй паветранай прасторы, у тым ліку для транзіту, як «выразны адказ на непрымальныя дзеянні і парушэнні правілаў беларускім рэжымам».
26 траўня ўрад Літвы прыняў рашэнне ад 3 гадзінаў ночы 27 траўня цалкам забараніць беларускім авіякампаніям доступ у паветраную прастору Літвы, нават транзітам, расказаў у Twitter міністр транспарту Літвы.
Таксама 26 траўня Рада дзяржаўнай бяспекі Чэхіі вырашыла прыпыніць працу «Белавія» ў краіне.
«Белавія» ў адказ скасавала палёты ў Фінляндыю і Чэхію. Рэйсы ў Чэхію і Фінляндыю скасавалі да 30 кастрычніка, хоць спачатку паведамлялі, што ў Чэхію скасоўваюць рэйсы толькі да 30 чэрвеня.
Фінскае Агенцтва транспарту і сувязі адклікала дазвол «Белавія» на палёты ў Фінляндыю.
Шведскае транспартнае агенцтва скасавала дазвол на палёты «Белавія» ў Швецыю і назвала рашэнне «прафілактычным», бо ў агенцтве «не бачаць гарантыі бяспекі», а бяспека пасажыраў «перадусім».
Урад Латвіі вечарам 25 траўня ўвёў абмежаванне выдачы дазволаў на палёты для зарэгістраваных у Беларусі авіяперавознікаў. Таксама аэрапорты краіны не будуць абслугоўваць самалёты іншых краінаў, якія выкарыстоўваюць паветраную прастору Беларусі.
Аблятаць Беларусь без загадаў ураду пачалі самалёты доўгага шэрагу авіякампаніяў, у ліку якіх «Austrian Airlines», «Singapore Airlines», польская «LOT», нямецкая «Lufthansa», вугорская «WizzAir», кіпрская «AviaSolutions», японская «All Nippon Airways», іспанская «Iberia» і іншыя.
Дзяржаўны памежны камітэт Беларусі заявіў, што скасаванне авіярэйсаў цяпер не дае іншаземцам вярнуцца на радзіму, але пацярпелым параіў звяртацца ў свае дыпламатычныя прадстаўніцтвы.
23 траўня самалёт «Ryanair», які ляцеў з Афінаў у Вільню, зрабіў вымушаную пасадку ў Менску праз інфармацыю аб «мініраванні», якую экіпаж атрымаў ад беларускіх дыспетчараў. У Менску затрымалі прынамсі двух пасажыраў: блогера Рамана Пратасевіча і ягоную сяброўку Сафію Сапегу. Астатніх пасажыраў адпусцілі пад вечар. Гендырэктар «Ryanair» назваў перанакіраванне самалёта ў Менск «дзяржаўным пірацтвам», прэм’ер-міністр Польшчы – «дзяржаўным тэрарызмам». Нямеччына асудзіла ў тым ліку відэа з «прызнаннем палоннага» Пратасевіча.
АА belsat.eu
