Затрыманага ў сакавіку кіраўніка Банку БелВЭБ Мацюшэўскага адправілі ў адстаўку
Васіль Мацюшэўскі пакінуў пасаду старшыні праўлення Банку БелВЭБ. Пра гэта паведамілі ў прэс-службе ўстановы.
Згодна з пастановаю назіральнай рады Банку БелВЭБ ад 25 красавіка, Васіль Мацюшэўскі вызвалены ад пасады старшыні праўлення паводле дамовы бакоў.
Выкананне абавязкаў старшыні з 26 красавіка ўскладзенае на першага намесніка Тараса Надольнага.
Лукашэнка выклікаў яго да сябе і паабяцаў рэформы банкаў
Таксама 26 красавіка Аляксандр Лукашэнка сустрэўся з Мацюшэўскім, старшынём КДК Васілём Герасімавым і першым віцэ-прэм’ерам Мікалаем Снапковым, запатрабаваўшы ад іх да чэрвеня ўнесці прапановы адносна прававых пытанняў працы банкаўскай сістэмы. Іх павінен падаць Камітэт дзяржкантролю.
Паводле Лукашэнкі, КДК нядаўна правяраў прыватныя і дзяржаўныя банкі. Былі выяўленыя хібы. Прэтэнзіі ёсць і да Васіля Мацюшэўскага, і да старшыні праўлення Нацыянальнага банку Паўла Калаура.
«Аказалася, што нястачы ўласцівыя ўсім нашым банкам. І мы робім адназначную выснову, што дрэнна працуем з банкаўскаю сістэмаю. Мы не стварылі для іх нейкай прававой каляі, у якой яны павінны выразна развівацца, прытрымлівацца пэўных нормаў, правілаў і законаў, не выходзячы за гэтую каляіну», – сказаў Лукашэнка.
Ён даручыў КДК дакладна вызначыць, што можна рабіць банкам, а што нельга.
29 сакавіка працаўнікі ДФР КДК уварваліся ў офіс БелВЭБу. Арыштавалі васьмёх працаўнікоў, у тым ліку з кіраўніцтва ўстановы. Сярод затрыманых былі Васіль Мацюшэўскі і Тарас Надольны, а таксама намеснікі старшыні Анатоль Барысевіч, Віктар Перапяліца і Дзмітрый Ляўданскі. Сілавікі схапілі таксама сябра праўлення Анатоля Паўловіча і дырэктара ў справе развіцця банку Аляксея Мазжухіна. Агулам за кратамі апынуліся восем асобаў.
Нацыянальны банк абвінаваціў БелВЭБ у «драбленні бізнесу і ўхіленні ад падаткаў» праз стварэнне ІТ-кампаніяў у ільготнай зоне ПВТ, а таксама вывядзенне дывідэндаў без адсоткаў праз падкрэслена легальную схему сацыяльнага страхавання, створаную «Прыёрбанкам».
Налічаны памер шкоды склаў 8 мільёнаў долараў.
Неўзабаве Мацюшэўскага вызвалілі. Магчыма, гэта зрабілі, каб Мацюшэўскі здолеў аператыўна знайсці сродкі для «кампенсацыі шкоды», перадае выданне са спасылкаю на крыніцы. Мацюшэўскі ўзначальвае банк з кастрычніка 2018 года. Выйшлі і астатнія функцыянеры банкаў.
Паводле крыніцаў «Нашай нівы», агульная сума, сплачаная за вызваленне топ-менеджараў, блізкая да $ 25 мільёнаў.
ПС belsat.eu
