Асвейская гаспадарка ў Верхнядзвінскім раёне прадала 31 племяннога каня цаною субпрадуктаў. Жывёлінаў набыў індывідуальны прадпрымальнік, які перапрадаў іх у Расею. Заведзеная крымінальная справа, піша «Sputnik» са спасылкаю на эфір дзяржаўнай тэлевізіі.
Тыдзень таму з’явілася інфармацыя, што адзіную ў Беларусі пароду запражных коней могуць адправіць на мясакамбінат. Гэтых жывёлінаў разводзяць у асвейскай гаспадарцы, што з увагі на рэарганізацыю пастанавіла распрадаць табун.
На прадпрыемстве зняпраўдзілі звесткі, што коней плануюць пусціць пад нож, аднак выявіўся факт незаконнага іх продажу.
Паводле інфармацыі дзяржаўных медыяў, 31 каня цаною субпрадуктаў купіў у гаспадаркі індывідуальны прадпрымальнік з Магілёўскай вобласці. Ён перапрадаў жывёлінаў у Расею, узяўшы 5,5 рубля за кілаграм жывой вагі.
«Дырэктар сельгаспрадпрыемства «Асвейскі» Верхнядзвінскага раёну Віцебскай вобласці, каб пазбегчы адказнасці за нясвоечасовую выплату заробку, без атрымання дазволу на рэалізацыю і насуперак нарматыўным актам рэалізаваў 31 чыстапароднага племяннога каня цаною субпрадуктаў», – паведамілі ў абласным Камітэце дзяржкантролю.
На прадпрымальніка, якога ўжо затрымалі, і былога дырэктара гаспадаркі «Асвейскі» завялі крымінальную справу.
Сцяпан Кубік belsat.eu