Затрымалі навукоўца, футбольнага фана, 18-гадовага юнака і чалавека ў майцы БНР100. Рэпрэсіі 25 верасня

Ад лета 2020 года ў Беларусі не спыняюцца палітычныя рэпрэсіі: штодзень людзей затрымліваюць з палітычных прычынаў, практычна штодзень – судзяць і садзяць. Вось што стала вядома толькі 25 верасня.

Ілля Салаўёў, затрыманы за ўдзел у пратэстах 2020 года.

Фота: Вясна / Telegram

• Беларус паехаў адпачыць у санаторый, а яго затрымалі за майку са «спецыфічнай сімволікай» (з гербам Пагоня і з надпісам «#БНР100 Хай воля вечна будзе з намі!»). Імя затрыманага не паведамляюць.
• За ўдзел у руху за свабодныя выбары затрымалі 35-гадовага супрацоўніка Акадэміі навук Алеся Бярнацкага.
• У Слоніме затрымалі былога футбольнага фаната, 37-гадовага Дзмітрыя Жукоўскага. Паводле праўладных каналаў, ён «распаўсюджваў экстрэмісцкія матэрыялы» ў «Аднакласніках».
• За ўдзел у пратэстах 2020 года затрымалі 18-гадовага Іллю Салаўёва. Сілавікі апублікавалі «пакаяннае відэа» з хлопцам.

Акрамя таго, 25 верасня стала вядома, што затрыманы арганізатар сустрэчы з расейскай блогеркай у ГЦ «Dana Mall». На сустрэчу днём раней сабралася некалькі тысяч чалавек. У нейкі момант праз перагрузку ліфта адбыўся экстраны прыпынак кабіны, дзе пачалася цісканіна. У выніку па медычную дапамогу звярнуліся пяцёра малалетніх дзяцей. Следчы камітэт паведаміў, што распачаў праверку па факце траўмавання дзяцей.

Алесь Наваборскі belsat.eu