Контрнаступ Украіны, уцёкі расейцаў з краіны і чаканне амністыі ў Беларусі. Навіны ў малюнках
Мінулы тыдзень быў вельмі багаты на падзеі – беларусы чакалі маштабную амністыю, але пакуль так і не дачакаліся. Затое Украіна перайшла ў контрнаступ і змусіла кіраўніцтва Расеі абвесціць мабілізацыю, якая, у сваю чаргу, справакавала жыхароў краіны на ўцёкі. Мастак Дэ Лёс разам з «Белсатам» сачыў за гэтымі ды іншымі гучнымі падзеямі.
Маштабную амністыю, паводле якой на волю павінны былі выйсці больш за 8 тысяч чалавек, у Беларусі чакалі 17 верасня, калі адзначаўся нядаўна ўтвораны ўладамі Дзень адзінства. Не аб’явілі яе і цягам цэлага тыдня. Улады працягваюць абяцаць, але папярэджваюць, што амністыя не для ўсіх.
Украіна перайшла ў контрнаступ яшчэ ў пачатку верасня і ўжо вызваліла больш за 3 тысячы квадратных кіламетраў захопленых расейцамі тэрыторыяў. Тэмп контрнаступу некалькі знізіўся, але відавочна, што на дадзеным этапе Украіна пераламіла ход вайны.
Для далейшага вядзення вайны Расеі давялося абвясціць частковую мабілізацыю. Яна прывяла ў рух не толькі тых, хто накіраваўся ў ваенкаматы. Расейцы запоўнілі аэрапорты, раскупілі ўсе квіткі на цягнікі на бліжэйшы час і ўтварылі даўжэзныя чэргі з аўтамабіляў на наземных пераходах мяжы.
На гэтым тыдні ў поле зроку Аляксандра Лукашэнкі трапілі прыватныя школы. Ён распарадзіўся ўвесці ліцэнзаванне іх дзейнасці і«зачысціць усё да немагчымасці ў сістэме адукацыі». Як паведамлялася раней, праблемы ў прыватных школ пачаліся яшчэ з пачатку навучальнага года. Да іх зачасцілі праверкі і адкрыць вучням дзверы 1 верасня змаглі не ўсе.
На дварэ восень і дождж, але пагрэцца ва ўтульных кватэрах пакуль што не атрымаецца. Уключаць ацяпленне раней 1 кастрычніка ўлады не абяцаюць. Але ёсць і добрая навіна – яго кошт пакуль што не зменіцца.
ДЛ belsat.eu
