На мапах «Google» у віртуальным Менску існуе дзве плошчы Сцяга: дзяржаўная і народная (што памятае падзеі 2020 года). Акцыі пратэсту, выказванне сваёй пазіцыі і архіў злачынстваў сілавікоў – усё гэта працягвае існаваць на электроннай мапе і даступна ўсяму свету. У сваю чаргу цэнзура дацягнулася да чысткі каментароў і выдалення здымкаў пад адрасамі дзяржаўных установаў.
Распавядаем, як і навошта змяняюцца выявы Менску на мапах «Google».
У «Google Maps» ёсць функцыя «Google Street View», якая дазваляе праглядаць вуліцы шмат якіх гарадоў свету. Вы можаце віртуальна вандраваць па больш як трох тысячах гарадоў і наведаць больш за 65 краінаў. Панарамныя здымкі робяцца з дапамогаю спецыяльных камераў з аглядам 360 градусаў. Іх мацуюць на аўтамабілі, ровары, снегаходы, у кватэры і нават носяць пешаходы ў адмысловых заплечніках. Але ў Беларусі гэтая функцыя не даступная. Таму карыстальнікі загружаюць свае асабістыя здымкі на «Google Maps».
Калі вы адправіліся вандраваць па Беларусі праз «Google Maps», вы абавязкова натрапіце на здымкі з пратэстаў 2020 года.
Стэла «Менск – горад-герой» – сімвал мужнасці беларусаў. «Google Maps» добра памятае падзеі 2020 года, а разам з тым карыстальнікі выкладаюць здымкі манументу, аздобленага ў чырвона-зялёнай гаме.
Таксама ў віртуальнай Беларусі існуе дзве плошчы Сцяга – дзяржаўная і народная. Злева і справа – здымкі, якія мы знайшлі праз пошук «плошча Сцяга».
Час ад часу карыстальнікі дзеля жарту змяняюць афіцыйныя назвы будынкаў. Звычайна змены не трываюць доўга. Але адзін пункт утрымліваецца больш за год – гэта «Прыбіральня Лукашэнкі».
Палац Незалежнасці ў Менску некаторы час меў назвы «Дом пацука» і «Склад бульбы».
Мы запыталі арт-актывіста , які называе сябе Аіда і працуе з «Вікіпедыяй», чаму выбудоўванне гісторыі ў сеціве важнае: «Вулічныя акцыі, банеры і транспаранты безумоўна патрэбныя ў сучасным свеце, каб змагацца з несправядлівасцю. Але цяжка ўявіць, як можа змяніцца сітуацыя, напрыклад, у Беларусі, калі мы выходзім на акцыю ў Варшаве. «Вікіпедыя» для гэтага добрая платформа, ёю карыстаюцца шмат асобаў, і пакінуць свой след «вандалізму» на фотаздымках не так ужо і цяжка. Я з’ехаў з Беларусі ў 2021 годзе, баючыся рэпрэсіяў, але да гэтага часу гуляю па вуліцах Менску і пакідаю свой мэсідж на будынках праз інтэрнэт. Пагадзіцеся: пасыл у выглядзе надпісу АСАВ на Міністэрстве ўнутраных справаў Беларусі выглядае вельмі каларытна, хоць і не паведамляе нічога новага. Усе ведаюць, хто працуе ў сілавых структурах краіны».
Яшчэ ў канцы 2021 года карыстальнікі пакідалі бойкія водгукі, апісвалі свае гісторыі пад пунктамі РАУСаў, турмаў ды іншых адрасоў будынкаў МУС. Далучалі таксама фота і відэа катаванняў падчас падзеяў 2020-га.
У канцы 2021 года можна было знайсці партрэты сілавікоў паводле месца іхнай працы. Такія партрэты таксама загружаліся карыстальнікамі.
Але нядаўна каментары і здымкі пачалі знікаць з электроннай мапы. Для прыкладу, СІЗА КДБ: здымкі экрана на першай карцінцы зробленыя ў канцы 2021 года. Калі мы зайшлі цяпер, ранейшых водгукаў і здымкаў мы не пабачылі.
Два гады ўлады метадычна перайначваюць найноўшую беларускую гісторыю. Рэпрэсіі сілавікоў прывялі да таго, што людзі выдалілі ці схавалі з адкрытага доступу свае здымкі з пратэстаў. Захоўваць і перасылаць такія здымкі таксама небяспечна. Сайты недзяржаўных медыяў у Беларусі заблакаваныя, увесь архіў TUT.by недаступны. Адначасова з інфармацыйным ціскам прапаганды адбываецца і візуальны ціск на вуліцах гарадоў. На што адразу рэагуе і іх інтэрнэт-адлюстраванне на мапах.
Але не ўсё так песімістычна, бо мы бачым на «Google Maps» Новую Беларусь!
Аліса Ганчар belsat.eu