У Вільні 22–23 красавіка праходзіла другая Канферэнцыя беларусаў свету. Пра вынікі расказаў Франак Вячорка – дарадца Святланы Ціханоўскай.
Паводле яго, галоўнай мэтай канферэнцыі было абмеркаванне таго, як зрабіць працу дыяспары больш эфектыўнай і больш патрэбнай беларусам у Беларусі, а таксама абмяркоўвалі, як актывізаваць супрацу між палітыкамі і актывістамі. Сабралася больш за сотню прадстаўнікоў дыяспараў з розных кантынентаў.
Дамовіліся пра чатыры справы:
1. Зрабіць 21 траўня Міжнародным днём палітвязняў, каб расказаць гісторыі тых, хто цяпер за кратамі, абмеркаваць спосабы іх вызвалення і дапамогі іхным сем’ям.
2. Шырыць інфармацыю пра еўрапейскія каштоўнасці і ідэі, каб беларусы выбіралі іх, а не «русский мир».
3. Прасоўваць беларушчыну – каб беларусы замежжа не гублялі сувязі паміж сабой і з тымі, хто застаўся ў краіне.
4. Працаваць разам беларусам замежжа з палітычнымі цэнтрамі, каб трымаць тэму Беларусі на парадку дня ў розных краінах.
«Мы таксама падзяліліся сваім болем, – прызнаўся Вячорка. – Сапраўды, цяпер цяжка, таму што няма яснасці, калі скончыцца ўвесь гэты кашмар, калі мы зможам вярнуцца ўсе ў Беларусь».
Але на канферэнцыі дамовіліся таксама абменьвацца звесткамі пра паспяховы досвед, «каб натхняць адно аднога» і пераймаць найлепшыя практыкі. Абмеркавалі голас дыяспараў у Каардынацыйнай радзе і Аб’яднаным пераходным кабінеце, магчымасць выкарыстання праграмы «Новая Беларусь» у інтарэсах дыяспараў. Размаўлялі і пра тое, каб беларусы ў розных краінах адвакатавалі тэму Беларусі і вызвалення палітвязняў, у тым ліку вылучаліся на мясцовыя выбары.
Алесь Наваборскі belsat.eu
