Прычынай выхаду Герасімені з Беларускага фонду спартыўнай салідарнасці сталі рознагалоссі
На мінулым тыдні, 19 красавіка, Аляксандра Герасіменя заявіла, што пакідае Беларускі фонд спартыўнай салідарнасці, на ўласнай старонцы ў Facebook.
Прычынай выхаду з фонду сталі разыходжанні ў поглядах з калегамі наконт таго, як трэба весці справы ў фондзе, расказала Герасіменя «Еўрарадыё».
«Тое бачанне справаў у фондзе мяне не зусім задаволіла. У нас былі разыходжанні і, каб не было канфлікту, я пастанавіла, што пакіну фонд, – распавяла Герасіменя. – Я буду змагацца да канца, і ўсё, што я магу і змагу зрабіць, буду рабіць і далей».
Таксама Герасіменя падкрэсліла, што ейны адыход – гэта не канец, а пачатак чагосьці новага, і гэта не азначае, што яна здалася. Пры гэтым яна заявіла, што фонд – гэта не толькі яна і ён будзе працягваць працу. Аднак што менавіта здарылася ў фондзе, спартсменка так і не распавяла.
«Калі падмурак, на якім усё мусіць трымацца, пачынае разбурацца, то, адпаведна, трэба паспрабаваць, каб гэтага не здарылася», – дадала яна.
Трохразовая прызёрка Алімпійскіх гульняў Аляксандра Герасіменя стала старшынёй Беларускага фонду спартыўнай салідарнасці ў сярэдзіне кастрычніку 2020 года.
АД belsat.eu
