Тыдзень таму расейскае вайсковае камандаванне абвесціла змену прыярытэтаў у вайне з Украінаю. Войскі РФ пастанавілі засяродзіць удар на Данбасе і поўдні Украіны, каб злучыць Крым з акупаванымі раней тэрыторыямі. Аднак вайсковы эксперт Мікалай Саламаха адзначыў, што расейцы сутыкнуліся з істотнымі праблемамі ў рэалізацыі плану і страцілі вялікую частку баяздольнай тэхнікі. У эфіры «Белсату» Мікалай Саламаха выказаў меркаванне, што расейскі наступ можа «скончыць свой патэнцыял» прыблізна праз 10 дзён, а войску ЗСУ, імаверна, пяройдуць у контрнаступ.
Эксперт адзначыў, што вайсковая дапамога ЗША можа адбіцца на баявых дзеяннях на Данбасе. Саламаха заявіў, што цяпер украінцы змогуць не толькі эфектыўна абараняцца, але і перайсці ў контрнаступ.
Паводле Мікалая Саламахі, расейскі план захопу вялікіх гарадоў і значнай часткі тэрыторыі Украіны быў даволі інфантыльным. Для выканання задачаў РФ трэба было мець трохразовую перавагу над ЗСУ, а каля вялікіх гарадоў суадносіны павінны быць 1:5 і 1:7.
«Задача была пастаўлена невыканальная. Украіна эфектыўна знішчае жывую сілу і тэхніку. Адкрытыя звесткі кажуць, што расейскае войска абяскроўленае. А папаўненне на замену маральна не гатовае весці ў тых умовах вайну, найлепшая тэхніка РФ спыненая. Траціна сучасная тэхнікі страчаная», – дадаў Мікалай Саламаха.
Украінскі эксперт адзначыў, што пасля цяжкіх стратаў тэхнікі ў РФ павінна адбыцца замена на састарэлую савецкую тэхніку. Такая тэхніка не такая эфектыўная, а асабовы склад таксама не будзе гатовы гэтак эфектыўна змагацца: «Яны не маюць належнага ўзроўню кваліфікацыі для вядзення баявых дзеянняў».
Таксама эксперт выказаўся і пра сітуацыю на Данбасе ды аптымістычна заявіў, што, імаверна, праз 10 дзён расейскі націск можа страціць сваю вастрыню:
«Цяжка ацаніць да апошняга жаўнера, але, як мне вядома з пэўных крыніцаў, Расея яшчэ мае 30 батальённых тактычных групаў. Мне не вядома, кінуць расейцы іх у бой ці будуць захоўваць рэзервы да апошняга. Спрагназаваць іх дзеянні складана. Калі яны кінуць апошнія сілы ў бой, то мы ўбачым яшчэ тыдзень – 10 дзён бесперапынных баёў таго ўзроўню, што адбываюцца на харкаўскім кірунку і Данбасе. Такім чынам прыблізна праз 10 дзён можа скласціся становішча, каб войскі Украіны правялі паспяховы контрнаступ».
Апроч таго, Мікалай Саламаха падзяліўся думкамі пра грэблівае стаўленне ўладаў РФ да стратаў уласнай жывой сілы. Эксперт паведаміў, што такое стаўленне да жыцця чалавека мае глыбокія карані ў гісторыі і ў прыватнасці нядаўніх савецкіх традыцыях:
«Давайце скажам, што такое стаўленне мае глыбокія карані і традыцыі. Гісторыкі ўва ўсім свеце не могуць палічыць, якія страты СССР зазнаў на франтах Другой сусветнай вайны. Мы не ведаем, колькі чалавек згінула падчас карных аперацыяў у Вугоршчыне, Польшчы, Афганістане. Лічбы называюць, але яны не пацверджаныя. Не раскрытыя архівы і не зняты грыф «сакрэтна» з дакументаў. Камандаванне РФ не валодае дастатковай інфармацыяй, бо шмат якія страты адбыліся там, дзе яны не змаглі замацавацца, і там цяжка падлічыць».
Нагадаем, што сёння 61-ы дзень вайны ва Украіне. 24 лютага Уладзімір Пуцін абвесціў пачатак «спецыяльнай вайсковай аперацыі», якая мусіла скончыцца за 3–7 дзён і мела на мэце змяніць палітычнае кіраўніцтва Украіны.
ЗХ belsat.eu