Старшыню АГП з Акрэсціна даставілі ў шпіталь. Кіраўніка БСДП знайшлі ў ізалятары Жодзіна
Старшыню Аб’яднанай грамадзянскай партыі Мікалая Казлова даставілі з ізалятару на вуліцы Акрэсціна ў Менску ў шпіталь МУС. Пра гэта паведамляе старонка АГП у Facebook.
Мікалая Казлова затрымалі 22 сакавіка. Раней ён скарыстаўся сваім законным правам і тройчы пасля допытаў адмовіўся даваць падпіску пра неразгалошванне. Яму прысуджалі 15 содняў і выклікалі на размовы ў РУУС. Пасля адной з гутарак Мікалая трое содняў утрымлівалі на Акрэсціна.
На пачатку сакавіка яму выставілі абвінавачанне паводле ч. 1 арт. 407 КК («Наўмыснае раскрыццё інфармацыі аб расследаванні, папярэднім следстве або закрытым судовым пасяджэнні»).
23 сакавіка Мікалаю Казлову стала дрэнна падчас суда пасля ночы, праведзенай у перапоўненай і залітай хлёркай камеры.
Між тым, дагэтуль не вядома, дзе цяпер старшыня Беларускай сацыял-дэмакратычнай партыі Ігар Барысаў. Яго затрымалі па дарозе ў краму 21 сакавіка і на наступны дзень арыштавалі на 15 содняў за непадпарадкаванне.
«Патавая сітуацыя, дзе цяпер на сённяшні дзень Ігар Барысаў, не вядома! Адвакату інфармацыю адмовіліся прадставіць на Акрэсціна, абаронца планаваў сустрэцца з кліентам для напісання скаргі!» – паведаміла ў Facebook жонка палітыка Алена Барысава.
Праз некаторы час яна паведаміла, што ейны муж знайшоўся ў ізалятары Жодзіна.
Ігар Барысаў быў адным з заяўнікаў акцыі на Дзень Волі. Але ўлады дазволіць яе правядзенне адмовіліся.
МГ belsat.eu
