Група дэпутатаў, якая называе сябе «Сябрамі Беларусі», звярнулася да Еўразвязу і Злучаных Штатаў.
У лісце дэпутаты пішуць: размяшчэнне расейскіх войскаў у Беларусі нясе пагрозу Украіне, Польшчы і Літве, а таксама можа быць часткай канчатковага плану акупацыі Беларусі.
«Далейшая прысутнасць расейскіх узброеных сілаў на патрабаванне нелегітымнага рэжыму Лукашэнкі павінна разглядацца як акупацыя Беларусі. Гэта мусіць быць абсалютна ясна выяўлена ў бягучым дыялогу ЗША і Еўразвязу з Расеяй. Любое дыпламатычнае рашэнне аб стрымліванні магчымай агрэсіі Расеі супраць Украіны не павінна быць коштам незалежнай і дэмакратычнай будучыні Беларусі», – гаворыцца ў лісце.
Гэты зварот падпісалі дэпутаты з парламентаў Злучаных Штатаў, Бельгіі, Ірландыі, Іспаніі, Латвіі, Літвы, Нямеччыны, Польшчы, Украіны і Эстоніі, а таксама польскі дэпутат Еўрапарламенту.
Гаворка відавочна ідзе пра пазапланавыя расейска-беларускія вучэнні «Саюзная рашучасць – 2022», якія маюць адбыцца на паўднёвых і заходніх межах Беларусі 10–20 лютага.
Намеснік міністра абароны РФ Аляксандр Фамін 18 студзеня заявіў, што колькасць удзельнікаў вучэнняў і асноўных сістэмаў узбраення не перавышаюць параметраў, якія падлягаюць апавяшчэнню, згодна з Венскім дакументам 2011 года. Паводле гэтага дакументу, каб не ствараць дадатковай напружанасці ў Еўропе, у выпадку правядзення вучэнняў з удзелам больш як 9 тысяч жаўнераў трэба за 42 дні да іх пачатку рассылаць апавяшчэнне (а пры колькасці больш за 13 тысячаў – запрашаць назіральнікаў).
У Беларусь прыбываюць расейскія вайскоўцы, завозяць зенітна-ракетныя комплексы, самалёты-знішчальнікі – агулам толькі на чыгунцы чакаецца 200 эшалонаў. Абавязку вывесці войскі адразу пасля апошняга дня вучэнняў няма – расейскія вайскоўцы могуць застацца на тэрыторыі Беларусі і ў час «рэферэндуму».
АА belsat.eu