Ані сваякі, ані адвакату не атрымліваецца даведацца месцазнаходжанне палітзняволенай Паліны Шарэнды-Панасюк. Пра гэта ў Facebook паведаміў ейны муж Андрэй Шарэнда.
Паводле яго, яшчэ 7 ліпеня палітзняволеную спецэтапам вывезлі з СІЗА №1 на Валадарскага ў Менску. З таго часу не атрымалася высветліць, дзе яна.
«Толькі зараз з ананімных крыніц атрымалася высветліць нейкія падрабязнасці, што здарылася з Палінай у пачатку чэрвеня перад этапам на псіхіятрычную экспертызу ў Навінкі. Адміністрацыя калоніі №24 арганізавала для Паліны так званую «прэсхату», падсадзіўшы да яе ў камеру ПКТ дзвух жанчын-првакатарак. Зразумела, што знясіленая многімі месяцамі знаходжання ў ШІЗА і ПКТ Паліна не змагла даць адпор і была моцна збіта. І так моцна, што ёй спатрэбілася шпіталізацыя ў санчастку калоніі. Па неправеранай інфармацыі ў Паліны было зламана рабро, ушыб ныркі і перабіта пераноссе. Нават праз амаль тры тыдні пасля збіцця 22 чэрвеня, калі Паліну бачылі ў СІЗА №1 на Валадарскага, у Паліны заставаліся шматлікія гематомы на твары і шныр на пераноссі», – паведаміў Андрэй Шарэнда.
Маці дваіх дзяцей Паліну Шарэнду-Панасюк затрымалі 3 студзеня 2021 года. Сілавікі са зброяй і ў бронекамізэльках выламалі дзверы ў ейную кватэру, учынілі ператрус, канфіскавалі маёмасць, а яе самую ў кайданках адвезлі ў ІЧУ. 9 чэрвеня 2021 года суддзя Яўген Брэган прысудзіў Шарэндзе-Панасюк два гады калоніі агульнага рэжыму. Абвінавачанне падтрымліваў пракурор Павел Крупеніч.
Паліна мелася выйсці на свабоду 6 жніўня, але супраць яе ўжо другі раз была заведзеная крымінальная справа паводле арт. 411 КК («Злоснае непадпарадкаванне патрабаванням адміністрацыі папраўчай установы»). Цяпер жанчыне пагражае да двух гадоў зняволення.
Якуб Хруст belsat.eu
