Сейм Літвы не ўхваліў прапановы абмежаваць колькасць паездак на радзіму за год для беларусаў, якія жывуць у Літве. Галасаванне чальцоў Сейму адбылося 23 красавіка, піша LRT.
Паводле праекту закону, беларусы, у якіх ёсць часовы від на жыхарства ў Літве, змогуць ездзіць у Беларусь не часцей за адзін раз на тры месяцы. Калі абмежаванне парушаецца, то ВНЖ прапаноўвалі адбіраць. Большасць дэпутатаў не падтрымалі гэтага.
За пазбаўленне часовага віду на жыхарства ў Літве за парушэнні прагаласавалі 20 дэпутатаў, супраць – 47, устрымаліся – 45.
За ўвядзенне абмежаванняў на паездкі выказаўся 41 дэпутат, супраць – 37, а ўстрымаліся – 39.
Працягваецца галасаванне наконт прапановы падоўжыць на год (да 2 траўня 2025 года) санкцыі ў дачыненні беларусаў і расейцаў ды зрабіць больш жорсткім надгляд беларусаў, якія ўязджаюць у Літву.
Абмяркоўвалася і прапанова прыпыніць прыём візавых заяваў ад грамадзянаў Расеі і Беларусі літоўскімі візавымі офісамі за мяжой, калі гэта не будзе зроблена пры пасярэдніцтве Міністэрства замежных справаў Літвы.
«Мы абапіраемся на справаздачы нашых спецслужбаў. Ужо ў леташняй справаздачы яны адзначалі і падкрэслівалі, што перасячэнне мяжы ў такой колькасці і з такіх падставаў уяўляе рэальную пагрозу нацыянальнай бяспецы Літвы і ў той жа час патэнцыйна спрыяе ўмацаванню сетак расейскіх і беларускіх спецслужбаў у Літве і за мяжой», – сказаў журналістам кансерватыўны палітык Аўдронюс Ажубаліс, які прэзентаваў першапачатковы варыянт праекту.
Арсен Рудэнка belsat.eu
