На нарадзе прэзідэнт Расеі Уладзімір Пуцін заявіў, што Расея будзе прадаваць газ за расейскія рублі, бо атрымліваць аплату ў доларах і еўрах цяпер «не мае сэнсу».
«За апошнія некалькі тыдняў, як вы ведаеце, шэраг заходніх краінаў прынялі нелегітымныя рашэнні аб так званым замарожванні расейскіх актываў, і гэты «калектыўны Захад» фактычна падвёў рысу пад надзейнасцю сваіх валютаў – пра гэта таксама мы ўжо казалі – перакрэсліў давер да гэтых валютаў. І Злучаныя Штаты Амерыкі, і ЕЗ абвесцілі, у прынцыпе, дэфолт сапраўдны у сваіх абавязацельствах перад Расеяй. І цяпер у свеце кожны ведае – вось так падазравалі, а цяпер ведае кожны, што абавязацельствы ў доларах і еўрах могуць быць не выкананыя», – сказаў Пуцін.
Пуцін заявіў, што цяпер пастаўляць расейскія тавары ў Еўрапейскі Звяз, у Злучаныя Штаты і атрымліваць аплату ў доларах, еўрах, шэрагу іншых валютаў не мае ўжо ніякага сэнсу.
«Мною прынятае рашэнне ў самы кароткі час рэалізаваць комплекс мераў для пераводу аплаты – пачнём з гэтага – нашага прыроднага газу, які пастаўляецца ў так званыя недружалюбныя краіны, за расейскія рублі», – сказаў ён.
Таксама Пуцін паведаміў, што Расея працягне пастаўляць прыродны газ у адпаведнасці з абʼёмамі і паводле цэнў, прынцыпаў цэнаўтварэння, зафіксаваных у падпісаных раней кантрактах, але кантракты з «недружалюбнымі краінамі» павінны быць скарэктааваныя, каб валютаю плацяжу быў расейскі рубель.
Змяненні закрануць толькі валюту плацяжу, якая зменяць на расейскія рублі. Змены адбудуцца цягам тыдня.
АД belsat.eu
