Распачаўся судовы працэс над 14 пінчукамі ў «пінскай справе» за падзеі 9–10 жніўня
У Берасці распачаўся суд у так званай пінскай справе за падзеі 9–10 жніўня ў Пінску. У тыя дні адбываліся жорсткія сутыкненні паміж пратэстоўцамі і сілавікамі: людзі заблакавалі будынак выканкаму і сталі патрабаваць сумленнага падліку галасоў.
Усяго ў справе праходзяць 14 пінчукоў, якіх абвінавачваюць паводле арт. 293 КК («Масавыя беспарадкі») за ўдзел у пратэстах.
У залу суда не пусцілі больш за 20 чалавек, у тым ліку журналістаў незалежных медыяў і сяброў абвінавачаных, перадае карэспандэнт «Белсату».
Аднак за падзеі тых дзён да крымінальнай адказнасці прыцягнулі больш пінчукоў. Начальнік упраўлення Следчага камітэту па Берасцейскай вобласці Дзмітрый Канаплянік паведаміў дзяржаўным СМІ пра тое, што ў суд перадалі больш за 30 крымінальных справаў: хуліганства, здзек з дзяржсімволікі і гвалтоўныя дзеянні.
АД belsat.eu
