Прэзідэнт Польшчы Анджэй Дуда заявіў пра гатовасць перадаць Украіне самалёты, аднак пакуль толькі савецкія МіГ-29. Пастаўкі больш сучасных знішчальнікаў Варшава будзе абмяркоўваць разам з партнёрамі, сказаў кіраўнік дзяржавы ў інтэрв’ю TVN24.
Анджэй Дуда паабяцаў перадаць Украіне знішчальнікі, калі «такія захады будуць ухваленыя». Найперш ЗСУ атрымае з польскіх запасаў МіГ-29.
«Гэта зручна для Кіева, бо ўкраінцы ўжо сёння могуць лётаць на гэтых мігах, у іх ёсць падрыхтаваныя пілоты. Аднак тое, ці перадамо мы нешта яшчэ, будзе прадметам нашых пагадненняў, якія мы будзем заключаць з нашымі саюзнікамі», – заявіў прэзідэнт Польшчы.
Анджэй Дуда пры гэтым адзначыў, што проста цяпер не можа аддаць Украіне хоць бы два самалёты F-16, бо для іх патрэбная адмысловая сэрвісная база.
Раней у інтэрв’ю Бі-Бі-Сі Дуда заўважыў, што рыхтаванне пілотаў больш складанае і працяглае, чымся, напрыклад, танкістаў, таму Украіна не здолее хутка пачаць выкарыстанне такіх самалётаў, як F-16:
«Пытанне ў тым, калі ўкраінскія лётчыкі будуць гатовыя пілатаваць сучасныя самалёты стандарту NATO. Цыкл рыхтавання пілотаў нашмат больш складаны і працяглы, чымся цыкл рыхтавання танкіста. Існуе пытанне, калі Украіна здолее выкарыстоўваць такія самалёты самастойна».
Сяргей Крот belsat.eu