У Віцебскім дзяржаўным медуніверсітэце (ВДМУ) студэнткі масава скардзяцца на аднаго з выкладчыкаў. З іхных словаў, мужчына надае неадназначныя знакі ўвагі на занятках і па-за навучальным працэсам. Дзяўчаты адчуваюць дыскамфорт і небяспеку, піша «Зеркало».
У рэдакцыю выдання звярнуўся чытач, які распавёў, што адзін з выкладчыкаў заляцаецца да студэнтак. У тэлеграм-канале «Студэнцкі канал ВДМУ» таксама паведамлялі, што атрымалі нямала скаргаў на аднаго з працаўнікоў кафедры фізкультуры.
На канале выклалі скрыншоты паведамленняў студэнтак, дзе тыя расказваюць, што выкладчык на занятках дазваляе сабе жарты інтымнага характару «з нагоды фігуры, сексуальнасці», кампліменты, «прыабдымкі», званкі па-за навучаннем, роспыты аб асабістым жыцці і запрашэнні на сустрэчы ў кавярні і ўдома.
«Ён ужо не адзін год гэтым займаецца. Яго запрашэнні «на сяброўскую гутарку» і на віно з торцікам закранулі прынамсі мяне і маю аднагрупніцу», – напісала адна са студэнтак.
Яшчэ адна расказала, што ён прапаноўваў ёй «вылечыць хворую частку цела рукамі, седзячы на канапе ў яго кабінеце». А на заўвагі, што гэта непрымальна і непрафесійна, «адказваў неразуменнем».
Студэнты ВДМУ напісалі нават зварот у рэктарат, каб там разабраліся з гэтым пытаннем. Адміністрацыя абяцала развязаць праблему, але вынікаў пакуль няма.
Журналісты звязаліся з кіраўніцтвам ВДМУ. Рэктар універсітэту Анатоль Шчасны паведаміў, што «сітуацыя пад кантролем, і ўсё ў межах заканадаўства».
«Размаўляем з людзьмі, высвятляем факты: ёсць яны ці не. Так што ў гэтым плане вы можаце не хвалявацца, будзе дадзеная прававая справядлівая ацэнка», – адказаў рэктар Анатоль Шчасны.
На пытанне, ці адхілены выкладчык ад заняткаў, рэктар адказаў: «Гэта ўжо нашае рашэнне». Паабяцаў, што афіцыйны адказ будзе апублікаваны на наступным тыдні.
ЗК belsat.eu