У Грэцыі не выключаюць магчымасці судовага разбору з дзейнымі ўладамі Беларусі з прычыны прымусовай пасадкі ў Менску самалёта «Ryanair», на борце якога быў беларускі апазіцыянер Раман Пратасевіч.
Паколькі борт накіроўваўся ў Вільню з Афінаў, разглядаецца магчымасць пачатку судовай справы супраць Менску, паведамляе «Euronews».
«Мы не забываем і пра згон самалёта «Ryanair». Паколькі лайнер вылецеў з Афінаў у Вільню, Грэцыя вывучае магчымасць пачатку крымінальнага пераследу адказных за гэта асобаў», – заявіў міністр замежных справаў Грэцыі Нікас Дэндыяс.
Каментуючы прынятыя Еўразвязам санкцыі, ён дадаў, што «гэта не супраць эканомікі Беларусі, гэта супраць беларускага рэжыму».
Нагадаем, што кіраўнікі МЗС краінаў Еўразвязу 21 чэрвеня прынялі рашэнні аб пашырэнні чорнага спісу ў дачыненні фізічных і юрыдычных асобаў Беларусі на 78 чалавек і 8 кампаніяў. Таксама яны далі згоду на сектаральныя санкцыі. Абмежаванні закрануць нафтавую і калійную прамысловасць, а таксама банкаўскі сектар. Іх мусяць ухваліць 24–25 чэрвеня.
Апроч таго, у гэты дзень свой санкцыйны спіс пашырылі ЗША, уключыўшы ў яго 16 фізічных і 5 юрыдычных асобаў, у тым ліку КДБ, унутраныя войскі, УУС Берасцейскага аблвыканкаму, ЦІП на Акрэсціна і ГУБАЗіК. Да санкцыяў далучыліся Канада, Вялікая Брытанія і Украіна.
А Паўночная Македонія, Чарнагорыя, Сербія, Албанія, Ісландыя, Ліхтэнштэйн і Нарвегія падтрымалі авіяцыйныя санкцыі Еўразвязу супраць уладаў Беларусі.
МГ belsat.eu
