Сейм Літвы ўхваліў у першым чытанні законапраект аб новых абмежаваннях у звязку з расейскай агрэсіяй ва Украіне. Ад грамадзянаў Беларусі і Расеі перастануць прымаць заявы на візы ў літоўскіх візавых службах, акрамя выпадкаў, калі пасярэднікам выступае МЗС рэспублікі. Таксама прыпыняецца прыём заяваў на атрыманне грамадзянства Літвы, паведамляецца на сайце парламенту краіны.
«Пераважная большасць грамадзянаў Расеі падтрымлівае ваенныя дзеянні сваёй краіны, яны не робяць крокаў, каб спыніць агрэсію рэжыму сваёй краіны, таму адказнасць кладзецца і на іх», – заявіла намесніца міністра замежных справаў Літвы Ёвіта Нялюпшыене на пасяджэнні парламенту. Яна мяркуе, што новыя абмежаванні «зменяць паводзіны» прыхільнікаў вайны.
«Каб змяніць іхныя паводзіны, мэтазгодна ўвесці абмежавальныя захады, звязаныя з магчымасцю грамадзянаў Расеі і Беларусі наведваць Літву і заязджаць на тэрыторыю Еўразвязу», – сказала чыноўніца.
Законапраект, ухвалены дэпутатамі Сейму ў першым чытанні, прадугледжвае шэраг абмежавальных захадаў. Беларусы і расейцы часова не змогуць прасіць літоўскага грамадзянства і дазволу на часовае пражыванне (за выняткам тых, у каго ўжо ёсць шэнгенская або нацыянальная віза або від на жыхарства ў Літве ці іншай краіне ЕЗ).
Таксама прыпыняецца прыём візавых заяваў ад грамадзянаў Расеі і Беларусі ў літоўскіх візавых службах за мяжою, акрамя выпадкаў, калі Міністэрства замежных справаў рэспублікі выступае пасярэднікам у падачы візавай заяўкі. Нельга будзе атрымаць і нацыянальную візу праз вонкавага пастаўніка паслугаў за мяжою.
Яшчэ закон прадугледжвае абнародаванне звестак аб эканамічных сувязях юрыдычных асобаў, што кіруюцца літоўскімі палітыкамі, з беларускімі або расейскімі партнёрамі.
Гэтыя захады тлумачацца пытаннямі нацыянальнай бяспекі.
Законапраект ухвалілі ў першым чытанні галасамі 113 дэпутатаў, 9 устрымаліся, супраць не галасаваў ніхто.
Чакаецца, што закон набудзе моц 15 красавіка і будзе дзеяць год з магчымасцю працягу.
Сяргей Крот belsat.eu