Урад Нямеччыны часова спыняе сертыфікацыю «Паўночнай плыні–2» з прычыны эскалацыі расейска-ўкраінскага канфлікту. Пра гэта паведамляе «Deutsche Welle».
Увод у эксплуатацыю газаправоду будзе замарожаны, паведаміў 22 лютага нямецкі канцлер Олаф Шольц. Ён паведаміў, што папрасіў міністэрства эканомікі і абароны клімату адклікаць дзейную справаздачу адносна аналізу надзейнасці забеспячэння, якую рыхтавала Федэральнае агенцтвам сетак.
«Гэта неабходны крок у адпаведнасці з адміністрацыйным правам, каб не магла рушыць услед сертыфікацыя газаправоду», – адзначыў Шольц.
Профільны Дэпартамент Мінэканомікі Нямеччыны дасць новую ацэнку бяспекі забеспячэння з улікам «змяненняў у апошнія некалькі дзён», растлумачыў канцлер.
«На гэтым этапе важна – акрамя першапачатковых санкцый [у дачыненні да Расеі – рэд. Belsat.eu] – перадухіліць далейшую эскалацыю і, тым самым, яшчэ адну катастрофу. На гэта накіраваныя ўсе нашы дыпламатычныя намаганні», – сказаў кіраўнік нямецкага ўраду.
ПС belsat.eu
