У Вільні адкрылі мурал з партрэтам праваабаронцы Алеся Бяляцкага. У цырымоніі ўзялі ўдзел віцэ-міністр Літвы Мантас Адоменас, прадстаўнікі Офісу Святланы Ціханоўскай, сябры нобэлеўскага лаўрэата, актывісты.
Ініцыятыва стварэння фрэскі ў гонар Алеся Бяляцкага належыць Міністэрству замежных справаў Літвы. За рэалізацыю ідэі ўзяліся мастакі з лабараторыі «Kiaurai sieńs» і калектыву «Gyva Grafika». Яны працавалі два дні.
Сёння, 21 снежня, адбылося адкрыццё муралу. На цырымоніі прысутнічалі віцэ-міністр Літвы Мантас Адоменас (Mantas Adomėnas), прадстаўнікі Офісу Святланы Ціханоўскай Франак Вячорка і Крысціна Рыхтэр, сябры і калегі праваабаронцы.
Алесь Бяляцкі – заснавальнік і старшыня праваабарончага цэнтру «Вясна». Быў затрыманы летась у ліпені. Яго абвінавачваюць у фінансаванні групавых дзеянняў, што груба парушаюць грамадскі парадак, і кантрабандзе.
Сёлета Бяляцкі стаў лаўрэатам Нобэлеўскай прэміі міру, узнагароду атрымала ягоная жонка Наталля Пінчук.
Праваабаронца прызнаны палітвязнем.
Сяргей Крот belsat.eu