Кіраўнік МЗС Арменіі ўслед за прэм’ерам рэспублікі адмовіўся ехаць у Менск на саміт АДКБ
Міністр замежных справаў Арменіі Арарат Мірзаян праінфармаваў беларускага калегу пра тое, што не прыедзе ў Менск на саміт АДКБ, паведаміў МЗС Беларусі. Прычыны гэтага рашэння не называюцца. Раней у саміце адмовіўся браць удзел прэм’ер-міністр рэспублікі Нікол Пашыньян.
Паводле інфармацыі, якую распаўсюдзілі міністэрствы замежных справаў Беларусі і Арменіі, Арарат Мірзаян «не зможа ўзяць удзелу» у сумесным пасяджэнні Савету міністраў замежных справаў, Савету міністраў абароны і Камітэту сакратароў саветаў бяспекі АДКБ.
Армянскі міністр паведаміў пра гэта беларускаму калегу Сяргею Алейніку падчас тэлефоннай размовы. Гутарка адбылася з ініцыятывы Менску.
З якой прычыны Мірзаян не прыедзе ў Беларусь, не ўдакладняецца.
У МЗС Арменіі адзначылі, што, апроч цяперашняй дзейнасці АДКБ, дыпламаты абмеркавалі пытанні двухбаковых стасункаў.
14 лістапада стала вядома, што на саміт Арганізацыі дамовы калектыўнай бяспекі, які адбудзецца ў Менску 23 лістапада, не прыедзе і прэм’ер-міністр Арменіі Нікол Пашыньян. Ён, праўда, сцвярджаў, што гэта не адмова ад удзелу, а «рашэнне не прысутнічаць на гэтых сустрэчах з розных прычынаў».
Стасункі Ерэвана з АДКБ пагоршыліся ў звязку з канфліктам з Азербайджанам. У Ерэване ўпэўненыя, што хаўрусніца Расея мусіла дапамагчы, аднак не зрабіла гэтага.
Раней Арменія адмовілася ладзіць вучэнні АДКБ на сваёй тэрыторыі, адклікала свайго прадстаўніка ў арганізацыі, а Пашыньян казаў, што «АДКБ сыходзіць з Арменіі».
Сцяпан Кубік belsat.eu
