Улады апублікавалі законапраект аб змяненні закону «Аб грамадзянстве Рэспублікі Беларусь». Згодна з ім, пазбаўляць беларускага грамадзянства, у тым ліку атрыманага пры нараджэнні, змогуць за «экстрэмісцкую дзейнасць».
Калі законапраект прымуць, то ўлады Беларусі змогуць ануляваць пашпарт, нават калі чалавек перабывае за межамі Беларусі.
Гэтак, беларускага грамадзянства могуць пазбавіць пасля прысуду, які пацвярджае ўдзел чалавека ў «экстрэмісцкай дзейнасці» альбо «нанясенне ім цяжкай шкоды інтарэсам Рэспублікі Беларусь», калі асоба жыве не ў Беларусі. Пад «экстрэмісцкую дзейнасць», у тым ліку, падпадаюць заклікі да санкцыяў, гвалт або пагроза выкарыстання гвалту ў дачыненні супрацоўніка органаў унутраных справаў ці службовай асобы.
Акрамя гэтага, калі ў з’ехалага з Беларусі ёсць грамадзянства ці ВНЖ іншай краіны або іншы дакумент, які дае льготы, у тым ліку «карта паляка», то трэба паведаміць пра гэта органам ўнутраных справаў або ў дыпслужбу на працягу трох месяцаў з дня атрымання. Калі грамадзянства ці дзеянне ВНЖ альбо іншага дакументу скончылася, таксама трэба інфармаваць органы ці беларускую дыпслужбу.
Цяпер жа законапраект павінен разгледзець у двух чытаннях парламент і перадаць на подпіс Лукашэнку.
Таксама асобе, якая страціла грамадзянства Беларусі, прапаноўвалася забараніць уезду ў краіну на тэрмін да 30 гадоў. Аднак гэтага пункту ў законапраекце няма.
Лукашэнка заяўляў, што даўно абмяркоўваецца пытанне пазбаўлення грамадзянства тых, хто «дзейнічае на шкоду дзяржаве і народу». Да гэтага праект зменаў у Закон аб грамадзянстве разглядзеў экспертны савет пад кіраўніцтвам старшыні Савету Рэспублікі Наталлі Качанавай. Летась ГУБАЗіК таксама прапаноўваў пазбаўляць грамадзянства беларусаў, якія з’ехалі з краіны, але тады ініцыятыва не атрымала развіцця.
Алена Рувіна belsat.eu