Гатэльны бізнес у Беларусі дагэтуль у цяжкай сітуацыі, калі параўнаць з узроўнем перадвыбарнага 2019 года. Пра гэта паведамляе Realt са спасылкай на «Кароткі агляд гасцінічнай нерухомасці гораду Менску за 2023 год», складзенага «NAI Belarus».
Аўтары справаздачы адзначаюць, што пасля 2020 года замежных турыстаў у Беларусі стала менш. У выніку ў 2020–2022 гадах у менскіх гатэлях значна знізіўся кошт пражывання.
З 2022 года пачаў адзначацца пэўны ўздым патоку турыстаў і сталы рост колькасці пастаяльцаў, найперш за кошт замежнікаў. Толькі за першае паўгоддзе 2022 года рост колькасці замежных гасцей у менскіх гатэлях склаў 17 %.
У 2023 годзе гэтыя тэндэнцыі працягнуліся. У пік адпускнога сезону адбываўся рост коштаў, але затым сярэдні ўзровень вярнуўся да ранейшага ўзроўню. У залежнасці ад катэгорыі гатэлю, зніжэнне склала 30–50 % да ўзроўню 2019 года.
«Паводле вынікаў 2023 года яшчэ малаверагодна, што атрымаецца паўтарыць вынікі паспяховага 2019 года, аднак прагназуецца, што ўзровень загрузкі будзе блізкі да гэтага паказніка», – адзначаюць у «NAI Belarus».
20 лістапада ў цэнтры Менску на нявызначаны тэрмін закрыўся гатэль «Crowne Plaza». Ён працаваў у Менску з 2008 года і быў першым пяцізоркавым гатэлем у Беларусі. Яго ўладальнік – турэцкі мільярдэр Судзі Эзкан.
Якуб Хруст belsat.eu
