«Белсат» падводзіць вынікі 665-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 20 снежня чытайце ў нашым аглядзе.
Купянскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
На паўночным усходзе Харкаўскай вобласці працягваюцца сустрэчныя баі каля сяла Сынькоўка ў Купянскім раёне, пры гэтым ніводны з бакоў канфлікту не фіксуе зменаў па лініі фронту.
Таксама на купянскім кірунку, паводле Міністэрства абароны РФ, украінцы атакавалі каля сяла Церны, але поспеху не дасягнулі.
У Генеральным штабе Збройных сілаў Украіны паведамілі, што на суседнім ліманскім кірунку сілы абароны краіны адбілі шэсць атак праціўніка на тэрыторыі Серабранскага лясніцтва, а таксама з усходу ад сяла Церны (поўнач Данецкай вобласці).
У Мінабароны РФ пішуць пра дзве няўдалыя атакі ўкраінцаў каля Дзібровы і Торскага ў Луганскай і Данецкай вобласцях адпаведна.
Бахмуцкі кірунак (лінія фронту ў ваколіцах аднайменнага гораду ў Данецкай вобласці)
Украінскае камандаванне паведаміла пра 12 няўдалых атак войскаў РФ на бахмуцкім кірунку каля населеных пунктаў Багданаўка, Клішчыеўка і Андрэеўка.
Аднак прарасейскія ваенкор Сямён Пегаў сцвярджае, што Узброеныя сілы РФ маюць сур’ёзныя тактычныя поспехі на захадзе і поўдні ад Бахмуту. У прыватнасці, яны контратакавалі каля Курдзюмаўкі і вярнулі частку раней страчаных пазіцыяў. На паўночным захадзе ад Клішчыеўкі яны выбілі ЗСУ з часткі вышыня, а ў ваколіцах Іванаўскага расейцы прасунуліся на ўчастку фронту каля трох кіламетраў. Акрамя гэтага, паводле ваенкора, УС РФ пасунулі праціўніка каля Хромава і Багданаўкі.
Тэлеграм-канал «Белорусский силовик» піша пра павелічэнне інтэнсіўнасці штурмавых дзеянняў з боку войскаў на паўдневым захадзе ад Багданаўкі, а таксама з захаду ад Хромава, што ўказвае на спробы атачыць ЗСУ ў Багданаўцы.
У сваю чаргу ўкраінцы на бахмуцкім кірунку ў чарговы раз спрабавалі прасунуцца каля населенага пункту Шумы (на захадзе ад Горлаўкі, але поспеху не дасягнулі.
Аўдзееўскі і мар’інскі кірункі (на поўначы і захадзе ад Данецку)
Ініцыятыва расейскіх вайскоўцаў захоўваецца і ў ваколіцах Данецку.
У Генштабе ЗСУ пішуць, што на паўночным фланзе адзееўскага кірунку сілы абароны краіны за содні адбілі 26 атак праціўніка каля Новабахмутаўкі, Стэпавога і Аўдзееўкі, на паўднёвым фланзе – дзевяць атак каля Севернага, Первамайскага і Невельскага.
На мар’інскім кірунку крыніца фіксуе 13 безвыніковых атак прасейцаў каля Краснагораўкі,Мар’інкі і Новаміхайлаўкі.
Між тым «Белорусский силовик» заяўляе аб прасоўванні УС РФ на поўначы ад Мар’інкі на адлегласць каля паўкіламетра.
Сямён Пегаў гаворыць, што расейцы занялі новыя пазіцыі на захадхе ад гораду, а таксама зайшлі ў паўднёвую частку Новаміхайлаўкі.
У тэлеграм-канале 46-й аэрамабільнай брыгадзе ЗСУ пацвярджаюць заход перадавых атрадаў расейцаў у Новаміхайлаўку і пераход часткі сяла ў так званую шэрую зону, але адмаўляюць поспехі расейцаў на захадзе ад Мар’інкі.
Аналітыкі праекту Deepstate удакладняюць, што ў Новаміхайлаўцы УС РФ замацоўваюцца на могілках, ферме і складах, адначасова з гэтым перактдаюцца дадатковыя сілы для баёў за самое сяло.
Агулам, на мар’інскім кірунку расейцы намагаюцца прасунуцца за лінію населеных пунктаў Мар’інка – Пабеда – Новаміхайлаўка – Канстатынаўка, каб у выніку выйсці ў фланг і тыл групоўцы ЗСУ ў Вуглядары.
Бярдзянскі і мелітопальскі кірункі (лінія фронту на поўдні Данецкай вобласці, а таксама ў Запарожскай вобласці)
На поўдні Украіны найбольш актыўным участкам фронту застаецца выступ па фронце з поўдня ад гораду Арэхаў у Запарожскай вобласці.
Генштаб ЗСУ піша, што тут сілы абароны краіны адбілі прынамсі 12 атак праціўніка з захаду ад сяла Навапрокапаўка і каля Работына.
Пры гэтым прарасейскі тэлеграм-канал «Два майора» сцвярджае, што войскі РФ прасунуліся на некалькі сотняў метраў і захапілі апорныя пункты ЗСУ на ўчастку паміж сёламі Работына і Вэрбовае і прасу
Херсонскі кірунак (лінія фронту ў аднайменным рэгіёне)
Тэлеграм-канал «Рыбарь» піша пра баі на левым беразе Дняпра ў ваколіцах сяла Крынкі, дзе Збройныя сілы Украіны ўтрымліваюць невялікі плацдарм.
Паводле крыніцы, расейцы пасля артылерыйскага ўдару выбілі праціўніка з пазіцыяў у лясным масіве каля цяпліцаў (з поўдня ад населенага пункту). У гэты ж час самыя ЗСУ намагаюцца прасунуцца ў шэрай зоне на заходніх і ўсходніх ускрайках Крынак.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
