У непрызнаванай Нагорна-Карабахскай рэспубліцы паведамілі, што пагадзіліся на ўмовы спынення абстрэлаў рэгіёну. Войска будзе раззброенае і расфармаванае, а 21 верасня адбудуцца перамовы з Баку. Чакаецца, што бліжэйшым часам баявыя дзеянні спыняцца.
На Facebook-старонцы «НКР ИнфоЦентр» апублікаваны допіс пра поўнае спыненне агню ў рэгіёне з 13-й гадзіны мясцовага часу. У адказ непрызнаваная рэспубліка пагадзілася расфармаваць і цалкам раззброіць сваё войска і вывесці тэхніку ды ўзбраенне са сваёй тэрыторыі «з мэтаю найхутчэйшай утылізацыі».
Як паведамляецца, такая дамоўленасць з Азербайджанам дасягнутая пры пасярэдніцтве камандавання расейскіх міратворцаў:
«З 19 верасня Азербайджан пачаў шырокамаштабны наступ уздоўж усёй лініі сутыкнення, наносячы ракетна-артылерыйскія і авіяцыйныя ўдары. Цягам двух дзён баёў падраздзяленні Узброеных сілаў Арцаху гераічна абараняліся. На некаторых участках праціўнік здолеў прарвацца да пазіцыяў Арміі абароны, узяць пад кантроль шэраг вышыняў і стратэгічных дарожных вузлоў. Улічваючы гэта, улады Арцаху пагадзіліся на прапанову камандавання расейскай міратворчай місіі».
У непрызнаванай рэспубліцы таксама паведамілі, што ўсе пытанні пра рэінтэграцыю, гарантаванне правоў і бяспекі армянаў Нагорнага Карабаху, а таксама забяспечванне жыццядзейнасці насельніцтва ў межах Канстытуцыі Азербайджану будуць абмяркоўвацца на беспасярэдніх перамовах з Баку.
Першая сустрэча прадстаўнікоў Карабаху з азербайджанскімі ўладамі запланаваная на 21 верасня ў горадзе Еўлах.
Сяргей Крот belsat.eu