Рэдактара сайту «Виртуальный Брест» пакаралі за распаўсюд нібыта экстрэмісцкага матэрыялу

Падставаю для судовага працэсу стала публікацыя пра гісторыю затрымання жыхара Баранавічаў Уладзіміра Гундара, паведамляе БАЖ.

Два месяцы таму ў судзе Маскоўскага раёну Берасця ўжо разглядалі адміністратыўную справу аб прызнанні інфармацыйнай прадукцыі сайту «Виртуальный Брест» экстрэмісцкім матэрыялам. Падставаю для судовага працэсу ў чэрвені была публікацыя пра гісторыю затрымання жыхара Баранавічаў Уладзіміра Гундара. У якасці ілюстрацыі да тэксту на сайце змясцілі фота Гундара ў вопратцы з арнаментам. Прадастаўнікі ГУБАЗіК палічылі, што гэты арнамент нібыта ўтрымлівае свастыку, і прапанавалі суду прызнаць згаданую публікацыю экстрэмісцкім матэрыялам.

Тады суд задаволіў пазоў і прызнаў публікацыю экстрэмісцкай, але на гэтым прыгоды для рэдактара «Виртуального Бреста» Андрэя Кухарчыка не скончыліся. Праз некалькі тыдняў на яго склалі новы адміністратыўны пратакол: гэтым разам паводле ч. 2 арт. 19.11 КаАП РБ – за распаўсюд інфармацыйнай прадукцыі, змешчанай у рэспубліканскі спіс экстрэмісцкіх матэрыялаў. Справа зноў датычыла публікацыі, у якой быў змешчаны здымак Уладзіміра Гундара.

Пратакол некалькі разоў вярталі ў міліцыю на дапрацоўванне, пакуль 19 жніўня суд Маскоўскага раёну Берасця не прызнаў Андрэя Кухарчыка вінаватым.

Суд пакараў рэдактара «Виртуального Бреста» штрафам 10 базавых велічыняў (290 рублёў) і пастанавіў канфіскаваць у яго камп’ютарнае абсталяванне, на якім ён, паводле абвінавачання, здзейсніў правапарушэнне, распаўсюдзіўшы фота. Але, як адзначыў Андрэй Кухарчык, гэтую тэхніку ў яго забралі яшчэ ў ліпені падчас ператрусу і пакуль нічога не вярнулі.

ІІ belsat.eu