Але гэтага кіраўніцтву беларускага футболу мала. Разбіраемся, чаго яшчэ жадаюць футбольныя прадстаўнікі беларускіх уладаў.
Пасля ўварвання Расеі ва Украіну праз тэрыторыю Беларусі абедзве краіны-суагрэсаркі патрапілі пад санкцыі, але вось для футболу было зробленае выключэнне. І беларускі футбол застаўся на міжнароднай арэне. Праўда, матчы не могуць праходзіць на тэрыторыі Беларусі, а хатнія гульні мусяць праводзіцца на нейтральных палях і без гледачоў.
Ва ўсіх дзяржаўных СМІ цяпер толькі і размоваў, што пра пляжных футбалістаў. Яны – нібыта не было 2020 года і несупынных рэпрэсіяў – паехалі на чэмпіянат свету ў ААЭ пад дзяржаўным сцягам і з дэлегацыяй прадстаўнікоў рэжыму Лукашэнкі. У выніку Беларусь абгуляла Сенегал (6:4), Японію (3:1) і Калумбію (4:1) і ўпершыню ў сваёй гісторыі выйшла ў плэй-оф чэмпіянату свету. І гэта адзін з самых вялікіх поспехаў рэжымнага спорту за чатыры апошнія гады. Нагадаем, што зборная Украіны байкатуе гэты турнір з прычыны прыезду беларускай зборнай.
Яна атрымала шыкоўны каляндар на восень 2024 года, калі згуляе ў Лізе нацыяў па два матчы з Балгарыяй, Люксембургам і Паўночнай Ірландыяй.
Яшчэ яна дамовілася на два таварыскія матчы: з Чарнагорыяй (21 сакавіка ў Турцыі) і з Мальтай (на гэтай выспе – 26 сакавіка). А ў планах – гульня са зборнай Расеі, якая можа прайсці летам у Менску. Ад гэтай гульні кіраўніцтва беларускага футболу да апошняга моманту адмаўлялася, але цяпер сітуацыя рэзка змянілася.
Як сцвярджаюць нашыя крыніцы, УЕФА цяпер мае зносіны толькі з прадстаўнікамі рэжыму Лукашэнкі, іхныя апаненты фактычна выцесненыя з кола ўплыву. У выніку кіраўніцтва АБФФ спрабуе развязаць пытанні, якія яшчэ пару месяцаў таму здаваліся невырашальнымі. Прадстаўнікі беларускага футболу хочуць, каб з іх былі знятыя ўсе санкцыі і каб матчы Лігі нацыяў прайшлі ў Менску з гледачамі на трыбунах і пад дзяржаўнымі сцягамі.
Пробны камень – атрымаць дазвол на гульню ў Менску ў чэрвені супраць зборнай Расеі, якая знаходзіцца пад санкцыямі. АБФФ просіць зрабіць выключэнне і дазволіць правядзенне таварыскай гульні, такі запыт ужо накіраваны ва УЕФА.
– Працэнтаў на 90 матч з Расеяй адбудзецца, – сказаў першы намеснік старшыні АБФФ Андрэй Васілевіч. Дарэчы, на гэтую пасаду Васілевіч быў прызначаны з парушэннем закону, але пазней фармальнасці былі вырашаныя заднім чыслом.
А таксама Васілевіч дадаў:
– Мы прыкладаем максімальныя намаганні, каб матчы Лігі нацыяў прайшлі ў Менску. Пастанова выканкаму УЕФА яшчэ не прынятая, але мы чакаем зборную дома, на нашых стадыёнах, – сказаў Васілевіч.
Са словаў нашых крыніцаў, у кіраўніцтва АБФФ высокая ўпэўненасць, што ўдасца перагарнуць старонку і адбяліць не толькі беларускі футбол, але і расейскі. Нашыя крыніцы лічаць, што ў выпадку прыняцця такой пастановы мусяць сказаць сваё слова ўрады дэмакратычных краінаў.
У гэтай сітуацыі паказальны прыклад Літвы, якая адмовілася гуляць з Беларуссю. УЕФА быў вымушаны ісці на кампраміс, развязваючы гэтае пытанне. У выніку выйсце было знойдзенае і Літве не давялося гуляць з Беларуссю.
АЛ belsat.eu