Работнікі наркакантролю затрымалі рэкордную за апошнія тры гады партыю наркотыкаў масаю больш за 47 кілаграмаў: гэта каля 50 тысяч дозаў. Яна належала найбуйнейшаму наркамаркету – «Scorpion», паведаміў намеснік міністра ўнутраных справаў Генадзь Казакевіч, перадае прэс-служба МУС.
У ведамстве адзначаюць, што спачатку працаўнікі наркакантролю Віцебскай і Гарадзенскай вобласцяў затрымалі 23-гадовага кіроўцу адной з будаўнічых арганізацыяў, які перавозіў у арандаванай машыне 1,6 кг псіхатропнага рэчыва.
Пазней аператыўнікі ўстанавілі ягонага 24-гадовага суўдзельніка – беспрацоўнага жыхара Горадні, які дастаўляў наркотыкі ў Беларусь і арганізоўваў склады. Пры ім выявілі каля 1 кг аналагічнага псіхатропу, а ў тайніках у Гарадзенскай і Менскай вобласцях – яшчэ 45 кг наркотыкаў.
«Гэта самая буйная партыя за апошнія тры гады. Яе кошт перавышае 2,5 мільёна долараў. І гэта не транзіт, яна прызначалася для ўнутранага рынку Беларусі», – паведаміў Казакевіч.
Распаўсюдзіць партыю ў Гарадзенскай, Менскай і Віцебскай вобласцях рыхтавалася інтэрнэт-крама наркотыкаў «Scorpion» – найбуйнейшая на сёння такая структура на тэрыторыі Беларусі, якая таксама працуе ў Расеі.
За мінулы год у Беларусі спынілі працу 19 наркамаркетаў, а з пачатку 2023-га – чатыры, дадае Казакевіч.
Алена Рувіна belsat.eu