Актывіста і сябру АГП Аляксандра Елісеева затрымалі пасля таго, як ён паўдзельнічаў у так званай «дыялогавай пляцоўцы» да «рэферэндуму», паведамляе «Палеская Вясна».
17 лютага Аляксандр Елісееў узяў удзел у абмеркаванні зменаў у Канстытуцыі на «дыялогавай пляцоўцы», якая ладзілася ў аграрна-тэхнічным ліцэі ў Калінкавічах. Апроч чыноўнікаў, на ёй прысутнічаў старшыня Калінкавіцкага райвыканкаму Сяргей Гвоздзь і дэпутат Палаты прадстаўнікоў ад Калінкавіцкай выбарчай акругі Яўген Адаменка.
Зранку 19 лютага дамоў да Елісеева прыехаў кіраўнік аддзелу аховы правапарадку і прафілактыкі Калінкавіцкага РАУС Станіслаў Расошка і сказаў, што супраць яго распачатая справа аб адміністрацыйным правапарушэнні і яму «трэба праехаць у РАУС».
Паводле якога артыкулу завялі справу, невядома. З пастарунку міліцыі Елісееў так і не выйшаў.
«Рэферэндум» па прыняцці зменаў у Канстытуцыю Рэспублікі Беларусь адбудзецца 27 лютага. Прадстаўнікі заходніх краінаў не лічаць «рэферэндум» дэмакратычным і не прызнаюць Лукашэнку легітымным кіраўніком Беларусі.
ЗК belsat.eu