Жыхар пасёлку Чонкі Гомельскага раёну Мікалай Сушкоў хацеў зарэгістравацца назіральнікам на мясцовым выбарчым участку №45 для правядзення «рэферэндуму». Яго выклікалі ў сельсавет, а потым асудзілі на 12 сутак арышту, паведаміла «Вясна».
Мікалай Сушкоў сабраў неабходную колькасць подпісаў і 18 лютага аднёс іх у сельсавет, дзе месціцца выбарчая камісія. Праз некаторы час яму напісаў паведамленне ў «Фэйсбуку» старшыня Чонкаўскага сельсавету Аляксей Кобзараў і запрасіў на сустрэчу.
Пасля паходу ў пасялковы выбаркам Мікалай перастаў выходзіць на сувязь.
Як даведаліся праваабаронцы, Сушкоў быў затрыманы і асуджаны на 12 сутак адміністрацыйнага арышту. Паводле якога артыкулу, пакуль невядома.
Паводле заканадаўства, кожны грамадзянін мае права быць назіральнікам, падаўшы ў камісію заяву, падпісаную не менш чым 10 грамадзянамі, якія пражываюць на адпаведнай тэрыторыі вобласці, раёну, гораду, участка для галасавання.
ЗК belsat.eu