Міжнародная гімнастычная федэрацыя (FIG) прызнала статус асобы галоўнага трэнера зборнай Беларусі па мастацкай гімнастыцы Ірыны Ляпарскай «нейтральным».
Гэта значыць, што яна можа быць чальцом беларускай дэлегацыі і прысутнічаць на найважнейшых турнірах году – Кубку свету, чэмпіянаце планеты альбо World Challenge Cups. Як вядома, Ірына Ляпарская ўсцяж падтрымлівае рэжым Лукашэнкі і польскі ўрад ўключыў яе ў спіс асобаў, якія падпадаюць пад санкцыі. Былы генеральны сакратар арганізацыі Пётр Дэк лічыць, што наўпроставы не ўдзел у вайне ва Украіне рэжыму Лукашэнкі не значыць, што спартоўцы, якія падтрымліваюць ягоны дыктатарскі статус, могуць мець нейтральнае становішча для выступу ў спаборніцтвах.
«Гімнасткі зборных Расіі і Беларусі рэдка выступалі на спаборніцтвах у Польшчы яшчэ да пачатку вайны ва Украіне. Пасля 24 лютага 2022 года яны ўвогуле не з’яўляюцца і я не думаю, што ў бліжэйшы час тут адбудуцца істотныя змены. Міжнародная гімнастычная федэрацыя паддалася на прапанову Міжнароднага алімпійскага камітэту і надала нейтральны статус галоўнаму трэнеру зборнай Беларусі па мастацкай гімнастыцы Ірыне Ляпарскай, вядомай сваімі шчыльнымі і трывалымі сувязямі з Лукашэнкам і ягонымі хаўруснікамі. У снежні 2023 года Ляпарская атрымала таксама ўзнагароду з рук міністра спорту Расеі Алега Матыцына», – кажа Пётр Дэк у размове з карэспандэнтам «Белсату».
Пётр Дэк адзначыў, што ў траўні 2023 года Ірына Ляпарская была ўнесена польскімі ўладамі ў спіс асобаў, якія трапілі пад санкцыі з-за падтрымкі палітыкі Лукашэнкі. Па той жа прычыне абмежаванні крануліся і былой гімнасткі зборнай Беларусі Кацярыны Галкінай, а таксама трэнера зборнай краіны Любові Чаркашынай. Варта нагадаць, што 11 снежня мінулага году ў Нацыянальным Алімпійскім камітэце Рэспублікі Беларусь адбылося ўзнагароджанне 20-ці ветэранаў беларускага спорту юбілейнымі медалямі Міністэрства спорту Расейскай Федэрацыі з нагоды стагоддзя ўтварэння дзяржаўнага органа ўпраўлення ў галіне фізічнай культуры і спорту. Сярод тых, хто атрымаў расейскія памятныя ўзнагароды і прадстаўніцы беларускай мастацкай гімнастыкі: Ірына Ляпарская ды алімпійская чэмпіёнка Сеулу-1988 у шматбор’і Марына Лобач.
У адрозненне ад мінулага сезону, сёлета беларускія гімнасткі ўсё ж выйдуць на буйныя міжнародныя старты. Ад 15 да 17 сакавіка ў грэцкім Паляё Фаліра стартуе серыя Кубка свету пад эгідай Міжнароднай федэрацыі гімнастыкі. Затым этапы пройдуць у Софіі, Баку і Ташкенце. Аднак у Будапэшце, на сёлетнім чэмпіянаце Еўропы, што адбудзецца напрыканцы траўня, ні расейскіх ні беларускіх прадстаўніц не будзе. Не на прыклад Міжнароднай федэрацыі гімнастыкі Еўрапейскі гімнастычны звяз не дапусціў (прынамсі пакуль) гімнастак з вышэйназваных краінаў на свае спаборніцтвы.
Раней стала вядома, што Міжнародная федэрацыя гімнастыкі надала статус «нейтральных», акрамя Ляпарскай, яшчэ 29-ці прадстаўнікам розных відаў гімнастычных спаборніцтваў (гімнастыцы спартовай і мастацкай, а таксама скачках на батуце). Расейскіх прадстаўнікоў гэтага віду спорту ў тым спісе няма ніводнага. Але апублікаваны пералік «нейтральных» спартоўцаў, трэнераў, лекараў нацыянальных камандаў мае права змяняцца. Прозвішчаў можа стаць як больш, гэтак і меней, калі знойдуць падставы кагосьці пазбавіць магчымасці выязджаць і выступаць на буйных турнірах.
Аляксандр Пуціла belsat.eu
