Адзін з праўладных тэлеграм-каналаў апублікаваў 20 студзеня «пакаяннае» відэа з затрыманым пісьменнікам і публіцыстам Севярынам Квяткоўскім. На відэа ён кажа, што ў 2021 годзе зрабіў перапост роліка, загаловак якога змяшчаў абразу аднаго з берасцейскіх міліцыянтаў.
«Зрабіў перапост роліку з YouTube, дзе ў загалоўку гучыць абраза аднаго з супрацоўнікаў берасцейскай міліцыі», – кажа на відэа Севярын Квяткоўскі і называе свае дзеянні няправільнымі. Ці выставілі яму абвінавачанне, пакуль невядома.
У міліцэйскім відэа паказалі, як затрымлівалі Севярына Квяткоўскага: узброеныя супрацоўнікі МУС выбілі дзверы ягонай кватэры.
Пра затрыманне пісьменніка Севярына Квяткоўскага 19 студзеня паведаміў тэлеграм-канал «By_culture». Цягам апошніх паўгода Квяткоўскі быў за межамі Беларусі.
Севярын Квяткоўскі – аўтар кніг «Як стаць беларусам. 100 гісторый», «Фрашкі да пляшкі», «Падарунак для Адэлi», «Каларадская пушча». Вядомы і як публіцыст.
ЗК belsat.eu