Беларуская лідарка Святлана Ціханоўская выказалася пра магчымы ўдзел Беларусі ў ваенным канфлікце. Заяву ў сувязі з прысутнасцю расейскіх войскаў у Беларусі для правядзення вучэнняў на мяжы з Украінаю распаўсюдзіла прэс-служба Ціханоўскай.
«Дэмакратычныя сілы катэгарычна супраць удзелу Беларусі ў ваенным канфлікце на чыім-кольвек баку. Гэта супярэчыць імкненню да нейтралітэту, закладзенаму ў дзейнай версіі Канстытуцыі. Нагадаю, што яна яшчэ не скасаваная», – заявіла Святлана Ціханоўская.
Беларуская лідарка адзначае, што стан вайсковай эскалацыі робіцца нормаю для рэжыму.
«Лукашэнка не здольны развязваць эканамічных праблемаў, таму шукае ворагаў і адкладае рэформы. Гэта пагаршае і без таго няпростае становішча грамадзянаў Беларусі. Мы заклікаем пачаць развязваць унутраныя праблемы краіны, а не ўмешвацца ў чужыя канфлікты», – гаворыцца ў заяве.
«Мы выступаем катэгарычна супраць уцягвання Беларусі ў гібрыдны канфлікт, што развязваецца супраць Украіны. Рэжым запрашае расейскія войскі на тэрыторыю Беларусі ў перыяд палітычнага абвастрэння, што ўжо ёсць непрыязным крокам у дачыненні Украіны. Вобраз Беларусі як мірнай і дружалюбнай краіны разбураны канчаткова», – адзначае Святлана Ціханоўская.
Лідарка заявіла, што рэгулярнае зʼяўленне на тэрыторыі Беларусі замежных войскаў нясе пагрозу незалежнасці краіны і павялічвае напружанасць у рэгіёне, гэта не адпавядае нацыянальным інтарэсам Беларусі:
«Межы і тэрытарыяльная цэласнасць дзяржаваў павінны быць недатыкальныя. Мы асуджаем любыя спробы замаху на чужую тэрыторыю.
Мы заклікаем развязаць усе канфлікты шляхам дыялогу без пагрозаў ужывання сілы або дэманстрацыі ваеннага рыхтавання».
«І я нагадаю, што Аляксандр Лукашэнка, які зазнаў паразу на мінулых прэзідэнцкіх выбарах, не мае права займаць пасаду прэзідэнта, рэпрэзентоўваць дзяржаву ва ўнутранай і вонкавай палітыцы, у тым ліку абвяшчаць і праводзіць ваенныя вучэнні», – падсумавала Святлана Ціханоўская.
ЗК belsat.eu
