У ноч на 17 лістапада пасля сутыкненняў мігрантаў з польскімі памежнікамі пад кантролем беларускіх сілавікоў частцы мігрантаў далі прытулак у лагістычным цэнтры «Брузгі». Што гэта за будынак?
Паводле розных крыніцаў, у цэнтр «Брузгі» трапілі ад тысячы да дзвюх тысячаў чалавек. Хоць улады сцвярджаюць, што ў лагістычны цэнтр змясцілі ўсіх мігрантаў, падобна, што там начавалі не ўсе: арабскамоўны Telegram-канал пра міграцыю публікуе відэа, паводле якога, як сцвярджаюць, у ноч на 19 лістапада натоўп людзей сядзіць ля вогнішча ў намётавым мястэчку на дварэ.
Якія ўмовы на складзе
Будынак стаіць за 1 км ад пераходу Брузгі на трасе М6. Агульная плошча комплексу – 10 тысячаў м². Склад разлічаны на 8500 палетамесцаў, то бок месцаў для паддонаў 100 х 120 см. У комплекс разам са складам уваходзіць стаянка на 200 машынамесцаў, гатэль на 40 месцаў, кавярня і аддзяленне банку, халадзільная камера, фітасанітарная і ветэрынарная служба. Ці засялілі кагосьці ў гатэль, невядома.
Склад не прыстасаваны для пражывання людзей: у ім ёсць толькі стэлажы для грузаў і працоўныя месцы для пары дзясяткаў чалавек. На відэа з цэнтру людзі спяць на некалькіх ярусах стэлажоў, адзін над адным.
Памяшканне складу ацяпляюць, ёсць уласная кацельная, але на відэа са складу людзі ў куртках і кофтах, нават шапках. На фота Памежнага камітэту відаць, што мігранты могуць наладаваць тэлефоны ў памяшканні.
Паводле асобы, звязанай са складамі «Брэміна», прыбіральні на складзе ёсць, а на фота Памежнага камітэту відаць, што біяпрыбіральні паставілі і звонку. Умываюцца людзі з цыстэрнаў на стаянцы.
У цэнтр учора прывезлі партыю гуманітарнай дапамогі, прыгналі аўталаўку, імправізаваную «Табакерку», зладзілі пункт абмену валютаў. Шаўрма ў шапіку пад складам каштуе 15-20 беларускіх рублёў. Раздавалі гарачую ежу і гарбату з вайсковай палявой кухні. Улады сцвярджаюць, што мігрантам хапае коўдраў і падушак.
Карупцыйны цэнтр?
Транспартава-лагістычны цэнтр, тады яшчэ пад назваю «Брэміна-Брузгі», адкрыўся паблізу беларуска-польскай мяжы ўзімку 2016 года.
Комплекс збудавала прадпрыемства «ВЛАТЭ Лагістык» паводле інвестыцыйнай дамовы з Гарадзенскім аблвыканкамам сіламі «Горадняпрамбуду». Размяшчэнне ля памежнага пераходу дае магчымасць заязджаць туды па вылучанай дарожнай паласе без афармлення працэдуры мытнага транзіту, а ўжо там праходзіць усе працэдуры мытнага афармлення. Гэта мае паскорыць пераход мяжы цяжкавікам да 10–15 хвілінаў: грузавік можа не стаяць на пункце пропуску, а заехаць у адасоблены цэнтр. У ім маркуюць алкаголь акцызнымі маркамі, маркуюць абутак ды іншыя тавары адмысловымі кодамі.
Таварыства «ВЛАТЭ Лагістык» зарэгістраванае ў 2013 годзе, уваходзіць у групу кампаніяў «Брэміна груп» – нацыянальнага лагістычнага аператара. Валодае не толькі цэнтрам «Брузгі», але і аналагічным комплексам «Бераставіца» каля памежнага пераходу на трасе са Слоніму на Беласток.
«Брэміна» мае падобны цэнтр і каля Воршы, у Балбасаве ля расейскай мяжы. Там на загад Лукашэнкі стварылі асаблівую эканамічную зону – фактычна афшор. У тым цэнтры ёсць нават аэрадром.
Група кампаніяў атрымала выключнае права будаваць мытныя тэрміналы на межах Беларусі і вызваленая ад сплаты падаткаў. Даходы з экспартна-імпартных схемаў, як паказала журналісцкае расследаванне, група пераводзіць праз фірмы з бенефіцыярамі на Кіпры.
«Гэтая фірма зарабляе на транзіце, пазбягаючы мытных плацяжоў і выплаты падаткаў, – тлумачыў раней эканамічны аглядальнік «Белсату» Станіслаў Івашкевіч. – З расследавання нашых малдаўскіх калегаў, якое працягнулі мы, можна меркаваць, што яны займаліся рээкспартам заходніх прадуктаў у Расею, у прыватнасці польскіх яблыкаў пад выглядам малдаўскіх».
Кампанія таксама аказалася звязанаю з кветкавым бізнесам.
«Брэміна» разам з кіраўнікамі трапіла пад санкцыі Еўразвязу і Злучаных Штатаў улетку 2021 года. Кампаніяй валодаюць Аляксандр Зайцаў, былы памочнік Віктара Лукашэнкі, а таксама Мікалай Варабей і Аляксей Алексін – іх усіх называюць бізнесоўцамі набліжанымі ды Лукашэнкі.
Чытайце таксама:
- Міграцыйны крызіс. Хроніка галоўных падзеяў
- Колькі каштуе сабрацца на мяжу? Пачыталі парады з мігранцкіх каналаў
- «Лепшага шляху ў Еўразвяз цяпер няма». Чаму мігранты ідуць праз Беларусь, нягледзячы на небяспеку
- Тлумачым, чаму мігранты ідуць праз Беларусь на Нямеччыну і што кажуць улады
- «Ім няма куды вяртацца». Курд расказаў, чаму ягоны брат наважыўся на падарожжа ў Беларусь і «штурм» мяжы
- «Гэта гандаль людзьмі». Шчырая размова з іракскім курдам
- Паралелі з палітвязнямі. Як беларусам не перасварыцца, дапамагаючы мігрантам?
- Што трэба ведаць пра беларускі канал нерэгулярнай міграцыі
- Забытыя мільёны. Колькі грошай Беларусь атрымала ад Еўразвязу на ўмацаванне мяжы?
- Да мяжы з Беларуссю – восем кіламетраў. Рэпартаж з Падляшша, дзе абвешчанае надзвычайнае становішча
- «Нас збілі беларусы, пакусалі сабакі… Мы хочам у Нямеччыну». Пра што ў сваіх роліках кажуць мігранты з мяжы
- Гаворка пра мільярды долараў. Колькі можа страціць Беларусь ад закрыцця мяжы з Польшчай
АА belsat.eu
