Беларускія праваабаронцы прызналі палітычнымі зняволенымі затрыманых 18 жніўня дырэктарку інфармацыйнага агенцтва БелаПАН Ірыну Леўшыну, былога дырэктара агенцтва Дзмітрыя Наважылава і бухгалтарку кампаніі Кацярыну Боеву.
Заяву падпісалі восем праваабарончых арганізацыяў, а таксама «Беларуская асацыяцыя журналістаў», якая і перадала заяву.
Праваабаронцы лічаць, што затрыманні і ператрусы ў супрацоўнікаў БелаПАН – «працяг мэтанакіраванай палітыкі ўладаў у абмежаванні распаўсюду непадцэнзурнай інфармацыі ў краіне і працяг наступу на свабоду слова».
Фармальна Ірына Леўшына, Дзмітрый Наважылаў і Кацярына Боева затрыманыя ў межах крымінальнай справы за «Арганізацыю ці падрыхтоўку дзеянняў, якія груба парушаюць грамадскі парадак». Праваабаронцы перакананыя, што сапраўдныя матывы палітычныя, а дзеянні сілавікоў маюць на мэце спыніць ці змяніць характар законнай дзейнасці БелаПАН.
Праваабаронцы патрабуюць неадкладнага вызвалення і супрацоўнікаў БелаПАН, і астатніх палітвязняў, якіх на сёння больш за 630. Таксама праваабаронцы патрабуюць перастаць ужываць крымінальны пераслед як інструмент ціску на свабоду выказвання меркавання.
БелаПАН – першае незалежнае беларускае інфармацыйнае агенцтва, заснаванае ў 1991 годзе. Агенцтва прадае навіны іншым выданням і ўстановам, а таксама вядзе інтэрнэт-газету Naviny.by.
У студзені 2021 года ў БелаПАНе ўжо адбываліся ператрусы. Тады іх чынілі працаўнікі УБЭП ГУУС Менскага гарвыканкаму паводле справы медыйнага менеджара Андрэя Аляксандрава. У 2015–2018 гадах журналіст працаваў намеснікам дырэктара БелаПАНу. 12 студзеня яго затрымалі ў якасці падазраванага паводле арт. 342 КК РБ. Як сцвярджалі ў МУС, журналіст з 22 жніўня да 9 лістапада аплаціў 250 штрафаў, грошы ён атрымліваў ад ініцыятывы «BY_help». 30 чэрвеня яму выставілі новае абвінавачанне паводле ч. 1 арт. 356 КК РБ «Здрада дзяржаве». Цяпер Аляксандраву пагражае ад 7 да 15 гадоў пазбаўлення волі. Беларускія праваабаронцы прызналі Андрэя Аляксандрава палітычным вязнем.
АА belsat.eu
