Святлана Ціханоўская выказала спачуванні ў сувязі з гібеллю лётчыкаў Андрэя Нічыпарчыка і Мікіты Куканенкі.
«Сёння пад Баранавічамі разбіўся вайсковы самалёт. Лётчыкі Андрэй Нічыпарчык і Мікіта Куканенка выявілі няспраўнасць – але не пакінулі борт, пакуль не пераканаліся, што падзенне самалёта не закране жылых дамоў. Яны катапультаваліся ў самы апошні момант – і гэта каштавала ім жыцця. Я выказваю спачуванні родным і блізкім Андрэя і Мікіты. І захапляюся іхным учынкам, бо ставіць жыццё іншых вышэй за ўласнае, – гэта сапраўдны гераізм», – адзначыла Святлана Ціханоўская.
19 траўня пад Баранавічамі пацярпеў крушэнне вайсковы самалёт Лідскай штурмавой авіябазы Як-130. Абодва яго пілоты загінулі.
На гэтым тыдні, 21–22 траўня, у Баранавічах меліся адзначаць 150-годдзе гораду. Сярод іншага 22 траўня планавалі дэманстратыўныя палёты вайсковай авіяцыі. Ці захаваюцца яны і надалей у праграме свята, ды ці будзе самое свята, не вядома.
МГ belsat.eu
