Беларускі расследавальніцкі цэнтр стаўся часткай міжнароднай раследавальніцкай платформы. Днямі стала вядома, што незалежны цэнтр, заснаваны камандай праектаў «Давайце разбірацца», «Лукавыя навіны», «Шчыра кажучы» і «Эканоміка з Чалым», якія выходзяць на тэлеканале «Белсат», далучыўся да пляцоўкі OCCRP. Установа займаецца расследаваннямі карупцыйных схемаў і злачынстваў, здзейсненых прадстаўнікамі рэжыму Лукашэнкі і набліжаных да іх расейскіх алігархаў.
Каманда Беларускага расследавальніцкага цэнтру ўваходзіла ў міжнародны кансорцыум, які працаваў над «Pandora Papers». Сярод іх расследаванняў – раскрыццё карупцыйнай схемы пры рэканструкцыі стадыёну «Дынама» ў Менску, схемы абыходу міжнародных санкцыяў і сувязяў блізкіх да ўлады бізнесоўцаў з афшорнымі кампаніямі. Днямі ў сваім новым расследаванні, праведзеным супольна з брытанскай «The Guardian», Цэнтр знайшоў нерухомасць у Лондане коштам у $ 200 млн, якая належыць сям’і Міхаіла Гуцэрыева і не трапіла пад накладзеныя на алігарха санкцыі.
«Гэтая важная падзея не толькі для нас, але і для нашай краіны. Таму што цяпер Беларусь не з’яўляецца белай плямай на мапе свету. Журналісцкія расследаванні – гэта важная частка грамадскага кантролю, дзякуючы якому карупцыйныя злачынствы не застаюцца беспакаранымі», – лічыць Станіслаў Івашкевіч, заснавальнік Беларускага расследавальніцкага цэнтру.
У міжнародным Цэнтры расследавання карупцыі і арганізаванай злачыннасці (OCCRP) лічаць, што з’яўленне новых удзельнікаў дапаможа больш эфектыўна змагацца з карупцыяй у сусветным маштабе і дасць магчымасць «пабудаваць лепшае разуменне, як рэгіянальныя дзейныя асобы і сеткі ўпісваюцца ў вялікую сетку глабальнай злачыннасці і карупцыі». Гэтыя спадзяванні звязаныя з асаблівасцямі працы аб’яднання, у аснове якога ляжыць абмен інфармацыяй паміж журналістамі з розных краінаў і рэалізацыя супольных трансгранічных праектаў. Для падтрымання гэтай дзейнасці OCCRP дапамагае журналістам рознымі рэсурсамі, у тым ліку сродкамі лічбавай і фізічнай абароны.
У Цэнтры расследавання карупцыі і арганізаванай злачыннасці (OCCRP) уваходзяць 55 СМІ з 42 краінаў свету. Цяпер і з Беларусі.
ЗХ belsat.eu