Школьная сістэма ў Беларусі накіраваная на фармаванне пакорлівага і лаяльнага ўладам чалавека: прапагандуецца правільнасць дзяржаўнага курсу, вучаць ставіцца да заходніх суседзяў як да ворагаў, навязваюць прарасейскую карціну свету, а найменшая праява іншадумства выклікае пагрозы і абразы. Пра гэта гаворыцца ў справаздачы «Правы дзяцей у Беларусі», падрыхтаванай Беларускім Хельсінкскім камітэтам. Звесткі для справаздачы збіраліся праз маніторынг адкрытых крыніцаў, а таксама ананімныя апытанні настаўнікаў, вучняў і іхных бацькоў.
Аўтары справаздачы адзначаюць, што пасля 2020 года ў школах усё больш увагі надаецца «патрыятычнаму» і «вайскова-патрыятычнаму» выхаванню. Тэарэтычна выхаванне падлеткаў у духу патрыятызму – цалкам нармальная мэта. Але ў сучаснай Беларусі «патрыятычнае выхаванне ёсць часткай сістэмы фармавання ў чалавека каштоўнасцяў, арыентаваных на вяршэнства дзяржавы і ўлады «моцнага».
«Патрыятычнае і ідэалагічнае выхаванне заснаванае на «адзіна правільным» гледзішчы ў адносінах дзяржавы і забараняе любую нязгоду з ёй», – падкрэсліваюць аўтары.
Адной з формаў такога выхавання ёсць прымусовы ўдзел школьнікаў у мерапрыемствах, на якіх наўпрост ці ўскосна дэманструецца падтрыманне рэжыму Лукашэнкі.
Рэспандэнты расказвалі аб фактах, калі адміністрацыі школаў проста падманвалі дзяцей: напрыклад, вучням прапаноўвалі пайсці ў кіно, тэатр, ускласці кветкі да помніка, а прыводзілі іх на мітынг, дзе раздавалі сцягі, значкі і фатаграфавалі. Прычым такія здымкі часта публікуюцца навучальнымі ўстановамі ў сваіх сацыяльных сетках без згоды бацькоў.
Акрамя таго, школьнікаў прыцягваюць да ўдзелу ў канцэртах, прысвечаных выбарам, прымушаюць маршаваць пад патрыятычныя песні, насіць піянерскія гальштукі, шмат разоў выконваць гімн і калектыўна праслухоўваць прамовы Лукашэнкі.
Фармальна ад удзелу ў такіх мерапрыемствах можна адмовіцца, але, паводле рэспандэнтаў, потым на цябе будуць «крыва глядзець» і «трэтыраваць». Часам вучням пагражалі ацэнкамі «нездавальняюча» за паводзіны, праблемамі на экзаменах, або наадварот – заахвочвалі да ўдзелу ў праўладных мерапрыемствах добрымі адзнакамі.
«Важна разумець, што простых дакладных загадаў аб абавязковасці наведвання на самой справе няшмат. Уся справа якраз у тым, што выкарыстоўваюцца мяккія формы ціску. Сістэма пабудаваная на тым, каб адміністрацыя школы і настаўнікі выконвалі тое, што неабходна, без афіцыйных папераў і прамых загадаў, на аснове «ну вы ж разумееце». Такім жа чынам спрабуюць выхаваць і дзяцей – рабіць, што кажа старэйшы, аўтарытэт, і не патрабаваць ніякіх законных, фармальных абгрунтаванняў».
Аўтары справаздачы зазначаюць, што ў патрыятычным выхаванні ў «вялікай канцэнтрацыі прысутнічае мілітарысцкі наратыў», які будуецца вакол гісторыі Вялікай Айчыннай вайны. Прычым акцэнт робіцца на выхаванне культу сілы, цікавасці да вайны: дзецям надзяваюць вайсковую форму, даюць у рукі зброю, ствараюць ваенна-патрыятычныя лагеры і класы, водзяць у ціры, а напярэдадні 9 траўня ўручаюць сімвалічныя «позвы на фронт». Рэспандэнты апісваюць выпадак, калі сацыяльны педагог, які праводзіць патрыятычныя заняткі, абураўся, што «ніхто не жадае паміраць за радзіму», называў дзяцей «ніякімі грамадзянамі» і «дэбіламі». Дзяцей малодшага школьнага веку палохаюць тым, што «фашысты прачнуліся і могуць таксама прыйсці ў нашую краіну».
Школьнікам транслюецца наратыў, паводле якога «заходні свет» ёсць ворагам і пастаяннай ваеннай пагрозай для «нашага» (разам з Расеяй) свету. 37,7 % апытаных бацькоў і вучняў распавядалі, што пасля пачатку вайны ва Украіне ў школах ладзіліся адмысловыя інфармацыйныя мерапрыемствы, дзе вучням распавядалі пра «нацыстаў» ва Украіне і казалі, што Расея ўкраінцаў «вызваляе». Школьнікаў пераконваюць у мірным характары дзеянняў Беларусі, а расейскую агрэсію называюць «спецыяльнай ваеннай аперацыяй».
Але такі погляд на вайну ва Украіне падтрымліваюць далёка не ўсе настаўнікі. На думку некаторых рэспандэнтаў, большасць педагогаў у іхных навучальных установах супраць вайны. Апісваюцца выпадкі, калі настаўнікі адмаўляюцца паўтараць на класных гадзінах афіцыйную прапаганду і размаўляюць з вучнямі з гледзішча здаровага сэнсу або нават тлумачаць, чаму Беларусь ёсць саўдзельніцай агрэсіі.
Аўтары справаздачы зазначаюць, што частку выхаваўчага працэсу бяруць на сябе прадстаўнікі органаў улады. У школах ладзяцца сустрэчы з міліцыянтамі, пракурорамі і амапаўцамі, мясцовымі дэпутатамі і чыноўнікамі, прадстаўнікамі праваслаўнай царквы. З гэтым сутыкаліся 54,5 % апытаных бацькоў і дзяцей.
Часта цэнтральная тэма такіх сустрэчаў – прапаганда правільнасці курсу рэжыму Лукашэнкі і фармаванне негатыўнага стаўлення да мірных пратэстаў 2020 года. Дзецям расказваюць, што бел-чырвона-белы сцяг – гэта нібыта сцяг нацыстаў, фашыстаў і экстрэмістаў, а тыя, хто якім-небудзь чынам з ім звязаны, таксама нацысты. На такіх сустрэчах фармуецца выключна станоўчае ўспрыманне Расеі як дзяржавы, якую неабходна падтрымліваць у «дэнацыфікацыі».
«Прыязджалі прадстаўнікі адміністрацыі Заводскога раёну, казалі, што будзе за тое, што мы выйдзем на мітынг, згадалі пра смяротнае пакаранне», – распавёў адзін з рэспандэнтаў.
Прадстаўнікі БПЦ рэгулярна праводзяць гутаркі з ключавым пасылам: «улада ад Бога, і пратэсты супраць улады – грэх».
Адміністрацыі школаў і запрошаныя прадстаўнікі ўладаў пераконваюць дзяцей у тым, што «непаўналетнім нельга мець свайго меркавання, асабліва наконт палітыкі».
«За меркаванне аб прэзідэнту, дзяржаве і палітыцы ў цэлым, якое супярэчыць дзяржаўнай ідэалогіі, і за іх публічнае выказванне дзяцей абражаюць, пагражаюць крымінальнай адказнасцю да дзяцей або іхных бацькоў, пастаноўкай на ўлік, накіраваннем у дзіцячы дом, выключэннем са школы, звальненнем бацькоў, прадузята ставяцца ў межах навучальнага працэсу.
Апісаныя выпадкі, калі на сустрэчах з прадстаўнікамі сілавых структураў нязгодных і вучняў, якія выказвалі сваю пазіцыю, адразу выводзілі з залы і затым ладзілі гутарку з удзелам сілавікоў. Некаторыя бацькі і дзеці пішуць, што ў школе праглядаюць тэлефоны дзяцей з мэтаю кантролю іхнай пазіцыі і меркаванняў. Некаторыя настаўнікі пішуць, што ім даюць указанні маніторыць сацыяльныя сеткі дзяцей», – адзначаецца ў справаздачы.
«Выказваць сваё меркаванне абсалютна немагчыма: страшна», – адзначыў адзін з рэспандэнтаў.
Фіксуецца шмат выпадкаў прамых абразаў вучняў за выказванне ўласных думак:
«Я выказала сваё меркаванне супраць гвалту з боку праваахоўных органаў і за свабоду слова… на што мне настаўніца сказала, што я мярзотніца, каб я закрыла свой рот і ніколі яго больш не адкрывала».
«Настаўнік на ўроку абражаў і прыніжаў дзяцей, якія спрабавалі выказацца наконт палітычнай сітуацыі ў краіне. Казаў, што ўсе, хто не падтрымліваюць прэзідэнта, проста дурні. Што беларусы гэта насамрэч расейцы, бо Расея вялікая краіна».
Праваабаронцы адзначаюць, што школьнікам навязваюць прарасейскую парадыгму каштоўнасцяў, перашкаджаюць праяўленню нацыянальнай ідэнтычнасці і самасвядомасці. Пад забаронаю любое выкарыстанне нацыянальных сімвалаў і сімволікі Украіны. Рэспандэнты кажуць, што на ўроках нельга маляваць бел-чырвона-белы сцяг, герб Пагоню, сцяг Украіны, нельга насіць спалучэння белага з чырвоным або жоўтага і блакітнага, не дазваляецца танчыць пад украінскія песні. Паралельна ствараецца культ дзяржаўнай сімволікі, за яе выпадковае псаванне пагражаюць адказнасцю.
«Абвінавацілі ў непавазе да дзяржавы, калі дзіця ўпусціла падораную ў школе кнігу аб Рэспубліцы Беларусь», – кажа адзін з рэспандэнтаў.
Праваабаронцы адзначаюць, што адной з самых абуральных формаў здушэння свабоды слова і перакананняў дзіцяці ёсць пагрозы бацькам з-за пазіцыі дзіцяці або пагрозы дзецям з-за пазіцыі бацькоў.
«Рэспандэнты таксама адзначаюць, што не рэдкія выпадкі, калі настаўнікі і адміністрацыя школы разумеюць неправамернасць афіцыйных ідэалагічных установак і спрабуюць іх згладзіць, просяць дзяцей і іхных бацькоў устрымацца ад публічнага выказвання іншых меркаванняў, бо гэта кантралюецца «зверху». Такая сістэма фармуе ў дзіцяці свайго роду «сацыяльную шызафрэнію» – звычку да «двайнога свету», калі на самой справе ўсе ведаюць і разумеюць, як правільна, але робяць па-іншаму».
Апошнім часам новай формай ідэалагічнай працы з дзецьмі сталі мерапрыемствы дзеля азнаямлення вучняў з сістэмай крымінальнага правасуддзя. Напрыклад, школьнікаў вядуць на «экскурсіі» ў аддзяленні міліцыі, папраўчыя ўстановы, а таксама прыводзяць на суды над іхнымі аднагодкамі. Аднак такая практыка пакуль не атрымала шырокага распаўсюду – з ёй сутыкаліся адзінкі рэспандэнтаў.
Паводле праваабаронцаў, формы і метады выхавання, якія сістэмна выкарыстоўваюцца ў беларускіх школах, «непрымальныя і неадэкватныя з гледзішча міжнароднага стандарту права на адукацыю, бо не адпавядаюць мэтам адукацыі і, такім чынам, парушаюць права на адукацыю». Таксама парушаюцца канстытуцыйныя правы дзяцей адносна свабоды меркаванняў і сумлення, свабоды ад дыскрымінацыі і г. д.
Пры гэтым аўтары справаздачы канстатуюць, што значная частка парушэнняў залежыць у тым ліку ад «творчага падыходу» адміністрацыі школаў і саміх настаўнікаў да выканання агульных даручэнняў «зверху». Школьная адміністрацыя пастаўленая ва ўмовы, калі яна разумее, што ад яе чакаецца дэманстрацыя лаяльнасці і гатовасць служыць, каб быць на добрым рахунку. Разам з тым, «нягледзячы на амаль два гады жорсткіх рэпрэсіяў, у сістэме ўсё яшчэ застаюцца настаўнікі, гатовыя не ўдзельнічаць у непрафесійных і незаконных дзеяннях».
Праваабаронцы кажуць, што школьная сістэма ў прынцыпе настроеная на тое, што дзіця павінна ўсё прымаць і згаджацца з усім, што кажуць настаўнікі, нічога не абмяркоўваць і не разважаць.
«Гэта частка фармавання лаяльнага дзяржаве чалавека, якому «дзяржава дае ўсё», і таму можа з яго патрабаваць усяго, што ёй (дзяржаве) трэба», – рэзюмуюць аўтары.
Праваабаронцы асобна апісваюць парушэнні правоў дзіцяці па-за межамі школьнай сістэмы – ідзецца пра пераслед дзяцей сілавікамі. Аўтары справаздачы канстатуюць, што практыка запісвання «пакаянных відэа», якія потым распаўсюджваюцца праўладнымі каналамі, выкарыстоўваецца і ў дачыненні падлеткаў: «На відэа бачна, што падлеткі дакладна напалоханыя – відавочна, на іх аказваўся псіхалагічны, а магчыма, і фізічны ціск».
На Гомельшчыне сілавікі сталі практыкаваць паказальныя затрыманні падлеткаў. За апошнія сем месяцаў міліцыя прынамсі тройчы арыштоўвала непаўналетніх дзяцей на вачах у аднагодкаў.
«Дзяцей збіраюць у актавай зале выканкаму або РАУС, прыводзяць падлетка, які падазраецца ў злачынстве, зачытваюць абвінавачанне, на падлетка надзяваюць кайданкі і выводзяць».
Публічныя затрыманні, у адрозненне ад «пакаянных відэа», не спалучаныя з палітыкай. Аднак праваабаронцы падкрэсліваюць, што такая практыка ў любым выпадку дэструктыўная і разбуральная.
Публічныя затрыманні і «пакаянныя» відэа не проста звязаныя з прыніжэннем і парушэннем правоў чалавека, але і здольныя нанесці цяжкую псіхалагічную траўму дзіцяці – прычым не толькі таму, хто зазнае экзекуцыі, але і таму, хто на гэта глядзіць.
Глеб Нержын belsat.eu