У Браварах пад Кіевам упаў верталёт ратаўнікоў. Загінулі кіраўніцтва МУС і тры дзіцяці
Раніцай 18 студзеня жыхары Бравароў Кіеўскай вобласці паведамілі пра выбух у горадзе, а затым пачаўся маштабны пажар каля дзіцячага садка.
«Реальный Киев», спасылаючыся на словы відавочцаў, паведамляў, што ў Браварах упаў гелікоптар ці БПЛА. Вакол усё зацягнутае дымам і гарыць, былі чутныя крыкі, усе спецслужбы на месцы.
Затым з’явіўся каментар Офісу прэзідэнта Украіна пра тое, што на абʼект сацыяльнай інфраструктуры на Кіеўшчыне ўпаў лятальны апарат.
Як распавялі ў кіеўскай паліцыі, у Браварах паблізу дзіцячага садка ўпаў шрубалёт, успыхнуў пажар.
«Падчас трагедыі ў дзіцячым садку былі дзеці і працаўнікі ўстановы. Цяпер усіх эвакуявалі. На месцы падзення працуюць хуткія, паліцыя і пажарнікі», – удакладніў кіраўнік Кіеўскай вобласці Аляксей Кулэба.
Затым у паліцыі Украіны паведамілі, што ў Браварах разбіўся гелікоптар Дзяржаўнай службы надзвычайных сітуацыяў (ДСНС). У выніку авіякатастрофы загінула кіраўніцтва МУС: міністр Дзяніс Манастырскі, першы намеснік міністра Яўгеній Енін і дзяржсакратар міністэрства Юрый Лубковіч.
На гэты момант паведамлялася пра 16 загінулых, у тым ліку дваіх дзяцей. Дзевяць загінулых былі на борце шрубалёта. У шпіталях застаюцца 22 пацярпелыя, у тым ліку 10 дзяцей.
Што здарылася
Як паведаміў спікер камандавання ВПС Юрый Ігнат, гелікоптар, які ўпаў у Браварах, выконваў задачы Дзяржаўнай службы надзвычайных сітуацыяў.
«На жаль, гэта здарылася са шрубалётам ДСНС, які выконваў задачы і здзяйсняў палёт. Ва Украіне цяпер ёсць пэўная колькасць такіх шрубалётаў, якія выконваюць задачы для абароны краіны», – заявіў Ігнат.
«Верталёт зрабіў тры колы над «Форай», вылецеў у цэнтр, пачаў рэзка зніжацца, ударыўся, загарэўся і ўсё», – распавёў браварчанін пра апошнія хвіліны перад авіякатастрофай.
У Офісе прэзідэнта Украіны паведамілі, што кіраўніцтва МУС паляцела на шрубалёце на заданне ў адну з гарачых кропак.
Паводле папярэдняй версіі следства, прычынай авіякатастрофы ў Браварах была памылка пілота.
Трагедыяй зоймецца СБУ
Як удакладніў прэзідэнт Украіны Уладзімір Зяленскі, загінулі 15 чалавек, у тым ліку трое дзяцей. Дакладная колькасць ахвяраў трагедыі высвятляецца. Траўмаваныя 25 асобаў, сярод іх – 10 дзяцей.
Зяленскі даручыў Службе бяспекі Украіны ва ўзаемадзеянні з Нацыянальнай паліцыяй Украіны і іншымі ўпаўнаважанымі органамі высветліць усе акалічнасці здарэння.
Якуб Хруст belsat.eu
