Раніцай 17 лістапада Расея атакавала Украіну ракетамі. Зафіксаваныя абстрэлы Дняпра, Адэсы, Запарожскай вобласці, загінулі і параненыя людзі, пашкоджаны і разбураны жылыя дамоў, абʼекты прамысловасці і крытычнай інфраструктуры. Расказваем, што вядома.
Момант прылёту расейскай крылатай ракеты. Горад Дняпро, Украіна, 17 лістапада 2022 года. Скрыншот з відэа. Крыніца: тэлеграм-канал «Zelenskiy Official» / V_Zelenskiy_official
З 7:30 да 8:00 паветраная трывога была абʼяўленая ва ўсіх вобласцях Украіны, акрамя Крыму. На гэты час агулам вядома пра 16 крылатых ракетаў і 5 беспілотных лятальных апаратаў, якія расейскія войскі выпусцілі па ўкраінскай тэрыторыі ў першай палове дня. Пра гэта паведаміў намеснік начальніка Галоўнага аператыўнага ўпраўлення Генеральнага штабу ЗСУ брыгадны генерал Аляксей Громаў на брыфінгу. Прадстаўнікі паветранных сілаў удакладнілі, што ракет было 18.
Газадабыванне і прамысловасць
Расейскія войскі запусцілі ракеты на газаздабывальных прадпрыемствах і дзяржпрадпрыемстве «Южмаш» у Дняпры. Аб гэтым прэмʼер-міністр Украіны Дзяніс Шмыгаль заявіў на Кіеўскім міжнародным эканамічным форуме.
«Цяпер над Кіевам пралятаюць ракеты. Цяпер бамбяць нашую газаздабычу, бамбяць нашыя прадпрыемствы ў Дняпры, «Піўдэнмаш», – паведаміў Дзяніс Шмыгаль падчас выступу.
Пасля стала вядома, што Расея ажыццявіла ўдар па двух інфраструктурных абʼектах у Дняпры. «Піўдэнмаш» – буйное ўкраінскае прадпрыемства вытворчасці ракетна-касмічнай тэхнікі і іншай навукаёмістай прадукцыі.
Днепрапятроўская вобласць
Яшчэ з ночы адбываліся артылерыйскія і ракетныя абстрэлы Днепрапятроўскай вобласці. Кіраўнік абласной вайсковай адміністрацыі Валянцін Рэзнічэнка паведаміў у сваім тэлеграм-канале, што расейскія войскі выпусцілі па вобласці больш за 70 снарадаў з «Градаў» і цяжкай артылерыі.
«Больш за 70 расейскіх снарадаў прыляцелі ноччу на Нікапальшчыну. Расейцы накіравалі свае «Грады» і цяжкую артылерыю на чатыры грамады – Міроўскую, Марганецкую, Чэрвонагрыгораўскую і Нікапальскую. Людзі не пацярпелі. Больш за ўсё пацярпеў Нікапаль. Там знявечаныя 20 шматпавярховых дамоў, гаспадарчых пабудоваў, каледж, машыны, газаправод і электралініі. Без электрычнасці 6000 абанентаў. Абстрэл абясточыў і помпавую станцыю мясцовага водаканалу. Больш за 40 тыс. семʼяў засталіся без вады. Энергетыкі ўжо рамантуюць лініі», – паведаміў Валянцін Рэзнічэнка.
Рэзнічэнка паведаміў, што расейскія ракеты атакавалі горад Дняпро, трапілі ў прамысловыя прадпрыемствы ў двух раёнах гораду. «Там вялікі пажар. Пашкоджаныя жылыя дамы побач». Спачатку паведамлялася пра пяць параненых. Сярод іх 15-гадовая дзяўчына. Усе пацярпелыя дастаўлены ў шпіталі ў стане сярэдняй цяжкасці. Далей лічба параненых вырасла да 14 чалавек.
На відэа з тэлеграм-каналу прэзідэнта Украіны Уладзіміра Зяленскага бачны момант прылёту адной з расейскіх ракетаў у горад Дняпро:
Зяленскі падкрэсліў у каментары да відэа, што «дзяржава-тэрарыст насамрэч хоча прынесці ўкраінцам толькі як мага больш болю і пакутаў».
Запарожская вобласць
Да пачатку масіраваных абстрэлаў усёй тэрыторыі Украіны уначы 17 лістапада расейскія войскі нанеслі ракетны ўдар па адным з населеных пунктаў у Вільнянскім раёне Запарожскай вобласці. У выніку трапляння трох ракетаў разбураныя цывільныя будынкі. У прыватнасці, двухпавярховы жылы дом, пад заваламі апынуліся людзі. Папярэдне паведамляецца аб чатырох загінулых.
Паліцыянты аглядаюць целы, знойдзеныя пад абломкамі жылога дому, разбуранага расейскім ракетным ударам у Вільнянскім раёне Запарожскай вобласці. Украіна, 17 лістапада 2022 года.
Фота: STRINGER / Reuters / Forum
Ратавальныя дзеянні працягваюцца. Пра гэта паведаміў старшыня Запарожскай абласной вайсковай адміністрацыі Аляксандр Старух. «Пад абломкамі дому яшчэ могуць заставацца людзі, паколькі ў ім жылі чатыры сям’і», – удакладніў кіраўнік адміністрацыі. Паводле яго, да разбору завалаў далучаныя 34 ратавальнікі, таксама ім дапамагаюць 10 валанцёраў.
Ратавальнікі працуюць на месцы разбуранага расейскім ракетным ударам жылога дому падчас нападу Расеі на Украіну ў Вільнянскім раёне Запарожскай вобласці. Украіна, 17 лістапада 2022 года.
Фота: STRINGER / Reuters / Forum
Мікалаеўская вобласць
У Мікалаеўскай вобласці паветранная трывога, паводле кіраўніка мясцовай абласной вайсковай адміністрацыі Віталя Кіма, была абвешчана праз дваццаць хвілін пасля поўначы, першыя ракеты былі запушчаныя каля 8-й раніцы. «4 першыя ракеты ў паветры. Беражэм сябе», – напісаў Віталь Кім. У 10:45 Кім паведаміў аб запуску яшчэ адной партыі ракетаў з Чорнага мора.
Адэская вобласць
Каля 9:15 стала вядома, што расейцы атакавалі абʼект інфраструктуры ў Адэскай вобласці. «Ёсць пагроза масіраванага ракетнага ўдару па ўсёй тэрыторыі Украіны. Прашу жыхароў вобласці знаходзіцца ў хованках», – заклікаў кіраўнік адміністрацыі Максім Марчанка.
Паводле звестак Адэскай раённай дзяржаўнай адміністрацыі, на 9:45 было вядома аб трох пацярпелых. «Сёння каторы ўжо раз была праведзена масіраваная атака на тэрыторыі Украіны і Адэскага раёну агулам – адбыўся выбух у 6:44 на тэрыторыі абʼекту інфраструктуры, папярэдне – у выніку трапляння крылатай ракеты. На месцы працуюць падраздзяленні ДСНС і паліцыя», – гаворыцца ў паведамленні.
Паводле аператыўнага камандавання «Поўдзень», у Адэсе пацярпеў адзін чалавек, выбуховай хваляй пашкоджаныя жылыя і прамысловыя будынкі. «Па Адэскай вобласці нанесены ракетны ўдар. З акваторыі Чорнага мора вораг зрабіў пуск «Калібраў», а з выкарыстаннем тактычнай авіяцыі з двух Су-30 накіраваў 6 ракетаў паветранага базавання. Паразілі лагістычны абʼект у абласным цэнтры. Пацярпела адна цывільная асоба», – гаворыцца ў паведамленні.
Кіеў і Кіеўская вобласць
Кіраўнік Кіеўскай адміністрацыі Аляксей Кулеба паведаміў раніцой, што ў вобласці актыўна працавала СПА. «Заставайцеся ў сховішчах і бяспечных месцах. Ні ў якім разе не фатаграфуйце месца прылёту і работу СПА», – заклікаў Кулеба насельніцтва.
Пазней у Кіеўскай гарадской вайсковай адміністрацыі паведамілі аб збіцці дзвюх крылатых ракетаў. «Папярэдне над Кіевам збітыя 2 крылатыя ракеты. Звестак аб ахвярах і разбурэннях няма, інфармацыя ўдакладняецца», – гаворыцца ў паведамленні. Акрамя таго, паводле звестак КМВА, над Кіеўскім вадасховішчам былі збітыя два БПЛА «Shahed».
Усяго за час паветранай трывогі 17 лістапада над Кіевам знішчылі 4 варожыя ракеты і 5 беспілотнікаў. Прылёты ў Кіеве і вобласці не зафіксаваны.
Львоўская вобласць
Таксама ў сацсетках былі паведамленні аб рабоце СПА ў Чаркаскай, Палтаўскай, Харкаўскай і Львоўскай вобласцях. У той жа час кіраўнік Львоўскай АВА Максім Казіцкі не пацвердзіў гэтай інфармацыі.
«Сёння таксама неспакойная раніца. Паветраная трывога працягваецца, ёсць небяспека… Некаторыя тэлеграм-каналы паведамілі, што ў Львоўскай вобласці нібыта працуе СПА. Станам на 09:42 такі факт не пацвярджаецца. Калі будзе такая сітуацыя, я абавязкова паведамлю», – напісаў ён у сваім тэлеграм-канале.
Харкаўская вобласць
Як паведаміў кіраўнік Харкаўскай абласной вайсковай адміністрацыі Алег Сынэгубаў, сёння расейскія войскі нанеслі ракетныя ўдары па Ізюмскім раёне.
«Зафіксаваныя траплянні па крытычнай інфраструктуры. На жаль, пацярпелі 3 работнікі, мужчынаў шпіталізавалі ў лячэбную ўстанову», – паведаміў ён.
Сітуацыя ў іншых вобласцях
Кіраўнікі некалькіх вобласцяў папярэджвалі аб небяспецы. У прыватнасці, старшыня Кіраваградскай адміністрацыі Андрэй Райковіч паведаміў, што ёсць небяспека. А кіраўнік Луганскай абласной адміністрацыі Сяргей Гайдай заклікаў не грэбаваць сёння сігналамі паветранай трывогі.
Начальнік Чаркаскай адміністрацыі Ігар Табурэц папярэдзіў, што існуе высокая імавернасць нападу з паветра. Аналагічнае паведамленне апублікаваў кіраўнік Палтаўскай адміністрацыі Дзмітрый Лунін.
Кіраўнік Хмяльніцкай адміністрацыі Сяргей Гамалій папярэдзіў аб магчымых атаках па энергетычных абʼектах.
«Вораг зноў узяўся за сваё: ёсць рэальная пагроза ракетнага ўдару! Настойліва заклікаю ўсіх заставацца ў сховішчах да заканчэння паветранай трывогі! Таксама нагадваю: удары накіраваны на абʼекты энергетыкі і інфраструктуры. Прашу трымацца далей ад такіх месцаў», – напісаў ён.
Hавiны
«Укрэнерга»: 15 лістапада адбылася самая вялікая атака ў гісторыі энергетыкі, ад якой пацярпелі ўсе рэгіёны Украіны
2022.11.16 10:50
Антон Тачняк belsat.eu