Камітэт дзяржаўнага кантролю паведаміў пра затрыманне двух кіраўнікоў гандлёвай сеткі «Дабраном», паведамляе тэлеканал СТВ. Супраць іх завялі крымінальную справу ў звязку з павышэннем коштаў у 120 крамах.
«Правяранне выявіла, што службовыя асобы ЗАТ «Дабраном», ведаючы пра забарону павышаць раздробныя цэны на тавары, не забяспечылі прыняцця належных захадаў для недапушчэння іх росту ва ўласнай раздробнай гандлёвай сетцы таварыства», – гаворыцца ў паведамленні КДК.
Цэны ў 120 крамах сеткі былі павялічаныя адносна 30 пазіцыяў, у тым ліку на каўбасныя вырабы, сыры, малочную ды іншую прадукцыю.
«Пачатая крымінальная справа ў дачыненні дзвюх службовых асобаў акцыянернага таварыства. Падазроных затрымалі. Праводзяцца неадкладныя следчыя дзеянні», – сказаў намеснік начальніка ўпраўлення Дэпартаменту фінансавых расследаванняў КДК Дзмітрый Дзягілеў.
Чыноўнік дадаў, што з пачатку дзеяння дырэктывы, якая забараняе павышаць цэны, у Беларусі заведзеныя 30 крымінальных справаў і затрыманыя 20 службовых асобаў.
Нагадаем, Савет Міністраў 6 кастрычніка прыняў пастанову аб забароне росту цэнаў. Затым Аляксандр Лукашэнка прыняў дырэктыву, якой загадаў стварыць працоўную групу, сабраць прапановы і да 20 кастрычніка прыняць замест старой пастановы ўраду новую: «сістэму рэгулявання цэнаў».
Алена Рувіна belsat.eu
