14 сакавіка Лукашэнка падпісаў указ № 93 «Аб дадатковых захадах па забеспячэнню стабільнага функцыянавання эканомікі». Указ прадугледжвае некаторыя аспекты функцыянавання эканомікі ва ўмовах санкцыяў, сярод якіх дапускаецца тэхнічны дэфолт.
Паводле ўказу Лукашэнкі «Аб дадатковых захадах па забеспячэнню стабільнага функцыянавання эканомікі», які з’явіўся яшчэ 14 сакавіка, Саўмін атрымаў шэраг паўнамоцтваў у справе прыняцця рашэння аб выплатах дывідэндаў, увядзення новых падаткаў, вызначэння памеру базавай арэнднай велічыні і іншыя моманты. Экстранныя захады ўрадоўцы могуць прымаць ва ўмовах санкцыйнага ціску на эканоміку краіны.
«У выпадку ўвядзення з боку недружалюбных краінаў абмежавальных захадаў, якія прадугледжваюць фактычнае «замарожванне» інвестыцыйных праектаў, што рэалізоўваюцца на тэрыторыі Рэспублікі Беларусь, прыпыненне іх фінансавання, пазбаўленне тэхнічнай магчымасці правядзення разлікаў па дзяржаўным доўгу ў замежнай валюце, Міністэрстве фінансаў, банкам-агентам, іншым юрыдычным асобам прадстаўляецца права па рашэнню Савету Міністраў (яго Прэзідыума) забяспечваць выкананне абавязкаў перад такімі краінамі ў нацыянальнай валюце», – занатавана ва ўказе.
Саўмін акрамя іншага атрымаў права прыпыняць выкананне пагадненняў па перадухіленні двайнога падаткаабкладання. Асобны пункт указу прадугледжвае барацьбу з вывазам капіталу з краіны.
У сітуацыі, калі краіна не можа выплочваць свае пазыкі замежным краінам, або заяўляе пра выплату ў сваёй валюце, гэта сведчыць пра тэхнічны дэфолт.
РК belsat.eu
