Абскардзіць вырак нельга, сваякі напісалі Лукашэнку. Што трэба ведаць пра справу «Белгазпрамбанку»
Ужо сёння адбудзецца першае паседжанне Вярхоўнага Cуда ў справе «Белгазпрамбанку». На судовай лаве яго былыя топ-менеджары на чале з Віктарам Бабарыкам. Пакуль улады рыхтуюцца паказаць расейскіх лялькаводаў, мы згадаем галоўныя факты пра рэзанансную справу.
Каго і за што судзяць
Галоўны фігурант справы – былы кіраўнік «Белгазпрамбанку» Віктар Бабарыка. Яго вінавацяць у стварэнні з 1 студзеня 2004 года арганізаванай злачыннай групоўкі са сваіх намеснікаў з мэтаю сістэматычнага атрымання хабараў ад камерцыйных арганізацыяў. У справе фігуруе сума амаль $ 15 млн. З 10 лістапада да 27 снежня 2018 года дзеля легалізацыі хабараў Бабарыка быццам набыў у Менску два капітальныя будынкі коштам больш за Br 1 млн.
Віктара Бабарыку, які пастанавіў узяць удзел у прэзідэнцкіх выбарах 2020 года, затрымалі разам з сынам Эдуардам 18 чэрвеня летась. Экс-банкіра вінавацяць паводле ч. 3 арт. 430 («Атрыманне хабару ў асабліва буйным памеры») і ч. 2 арт. 235 («Легалізацыя («адмыванне») сродкаў, атрыманых злачынным шляхам») Крымінальнага кодэксу.
На судовай лаве і шэсць былых падначаленых Бабарыкі. Іх усіх вінавацяць паводле ўжо згаданага артыкулу 430. Гэта Кірыл Бадзей, які летась стаў кіраўніком «Белгазпрамбанку» замест Бабарыкі, экс-намеснікі старшыні праўлення Сяргей Дабралёт, Дзмітрый Кузьміч, Сяргей Шабан і Аляксандр Ільясюк, а таксама былы першы намеснік праўлення Аляксей Задойка.
Яшчэ адзін абвінавачаны – генеральны дырэктар «Актыўлізінгу» Віктар Кабяк – праходзіць паводле ч. 2 арт. 431 («Даванне хабару паўторна ці ў буйным памеры»). Паводле следства, ён даў хабар памерам не менш як € 2,5 млн.
Ці прызнаюць яны віну?
Віктар Бабарыка «катэгарычна не згодны з выстаўленым абвінавачаннем», а ягоныя абаронцы настойваюць «на поўнай невінаватасці».
Усе іншыя фігуранты сваю віну прызнаюць. Кірыл Бадзей, Сяргей Дабралёт, Аляксандр Ільясюк, Віктар Кабяк, Дзмітрый Кузьміч і Сяргей Шабан падпісалі дасудовую дамову аб супрацы. А іхныя сем’і напісалі ліст Аляксандру Лукашэнку. Яны просяць вызваліць сваіх блізкіх ад крымінальнай адказнасці ў адпаведнасці з артыкулам 88 Крымінальнага кодэксу («Вызваленне ад крымінальнай адказнасці ў сувязі з дзейным раскаяннем»).
Акрамя Віктара Бабарыкі ў гэтым спісе няма Аляксея Задойкі. Ці пагадзіўся ён на супрацу са следствам, невядома. Сярод шасці чалавек, якія падпісалі дамовы аб супрацы і прысутнічалі на папярэднім паседжанні, яго не было. Але, як мы ужо згадвалі, прызнаваць віну адмовіўся толькі Бабарыка.
Добра, а ці адкрытае паседжанне?
Так. Фармальна на працэс можа трапіць кожны беларус. Для гэтага дастаткова мець пашпарт і медычную маску. Але ў беларускай рэчаіснаці наўрад ці можна на гэта спадзявацца. На суд над нашымі каляжанкамі Кацярынай Андрэевай і Дарʼяй Чульцовай шмат хто не патрапіў, нібыта праз захады эпідэмічнай бяспекі, хаця ў зале хапала месца яшчэ мінімум на некалькіх чалавек нават пры правільнай рассадцы.
Прадстаўнікі незалежных беларускіх медыяў трапіць на працэс, відаць, не здолеюць. Журналістам БелаПАН, TUT.BY, Naviny.by, Onliner, «Белорусы и рынок» у акрэдытацыі адмовілі. У судзе патлумачылі, што акрэдытавалі 20 журналістаў, якія ўчора адправілі заяўкі першымі. Хоць незалежныя медыя адпраўлялі іх і ўчора, і ў дзень, калі стала вядомая дата паседжання.
А ці можна абскардзіць прысуд?
Не, гэтага зрабіць не здолеюць. Паколькі справу разглядае Вярхоўны Суд, абскардзіць яго вырак ужо нельга ні ў якім іншым. Адвакаты Віктара Бабарыкі прасілі, каб працэс аддалі ніжэйшаму суду, аднак ім адмовілі.
ЯП belsat.eu
