Найгоршы вынік за сем апошніх сезонаў. Ці справядліва зборная Беларусі па гандболе выбыла з чэмпіянату Еўропы?
Зборная Беларусі па гандболе датэрмінова выбыла з барацьбы на чэмпіянаце Еўропы, паказаўшы найгоршы вынік за сем апошніх сезонаў. Каманда набрала на чэмпіянаце нуль пунктаў.
Пасля выгуляных у зборнай Расеі таварыскіх матчаў на старце рыхтавання да «Еўра» старшыня Беларускай федэрацыі гандболу Уладзімір Канаплёў прамовіў нават фразу, што зборная Беларусі можа і чэмпіёнам Еўропы стаць. Даўно, маўляў, гэтага заслугоўвае. А галоўны трэнер Юрый Шаўцоў падкрэсліваў:
«У нас вельмі добры мікраклімат у камандзе. Пакаленне 1996 года і маладзейшае. Раслі як адзіная сям’я».
Сугучна выказаўся і капітан зборнай Вячаслаў Бохан: «Касцяк асноўнай каманды аднаго года нараджэння. Людзі, якія гуляюць не адзін год разам. У шматлікіх юнацкіх і моладзевых зборных усе адно за аднаго гарою. І ў калектыве мы сустракаемся як родныя».
Перад ад’ездам на чэмпіянат кантыненту Канаплёў выказаўся аптымістычна яшчэ раз: «Склад у нас добры, мусім стрэліць».
Такі настрой трываў на фоне перамог над расейцамі, якіх увогуле раней ніколі не перагульвалі: ні ў таварысцкіх сустрэчах, ні на топ-турнірах. Хіба што на леташнім чэмпіянаце свету ў Егіпце закончылі спрэчку з імі ўнічыю 32:32. А потым пачаліся нервы. Перманентна ўзнікалі пытанні наконт аптымальнага складу на «Еўра-2022». Узяць трэба было 20 гандбалістаў, сярод якіх у заяўку на матч траплялі б 16. А на праглядзе было ў паўтара разу больш. Яшчэ ўлетку прынялі запрашэнне на міні-турнір у Вугоршчыну. Але ў выніку так і не згулялі там ні супраць гаспадароў, ні супраць Бахрэйну, бо адзін з прадстаўнікоў беларускай дэлегацыі меў станоўчы тэст на каронавірус. Уладзімір Канаплёў нават дапусціў магчымасць змовы супраць беларусаў. Нічога лепшага, як патлумачыць сітуацыю змовай супраць беларусаў, Уладзімір Канаплёў не прыдумаў.
Што ж было на гульнях «Еўра»?
Касцяк, як аказалася, не гатовы ісці наперад адзіным моцным кулаком. На старце турніру, што сёлета прынялі Славаччына і Вугоршчына, беларуская зборная пад кіраўніцтвам алімпійскага чэмпіёна Юрыя Шаўцова дала бой дружыне Нямеччыны, выгуляўшы першы тайм. А паколькі перамагаць не планавалі, то і саступілі без вялікай шкоды – 29:33. Фаварыт усё ж. Немцы пераканальна прайшлі кваліфікацыю, атрымаўшы шэсць перамог у шасці матчах. Далей, праўда, ісландскі настаўнік Бундэстым Альфрэд Гіслялан (Alfreð Gíslason) пачаў губляць наймацнейшых: нехта траўмаваўся, нехта не жадаў рабіць прышчэпку, а некаторыя аддавалі перавагу сямейным справам. Але нямецкая машына пакуль напоўніцу апраўдвае сваю мянушку. Правялі спарынгі са Швейцарыяй і Францыяй. І выгулялі іх. Няма ў іх стабільнай канкурэнцыі на пазіцыі разыграўцы? Нічога страшнага: даюць рады з гэтым паўсярэднія. Добра працуе і дальнабойная артылерыя.
Арцём Каралёк, адзін з лідараў зборнай Беларусі сцвярджаў, што каманда стала мацнейшаю за апошні год. Але мацнейшаю для каго? Для самой сябе? Але не для элітных і сярэдніх паводле класу супернікаў. Як тут ні згадаць дружыну Літвы? Нашыя суседзі не выступалі на топ-турнірах 24 гады, адзіны раз прабіўшыся на «Еўра» ў 1998-м. Зборная Беларусі гуляла ў чэмпіянатах Еўропы шэсць разоў, выходзячы ў фіналы чатырох апошніх турніраў. А тры апошнія разы займала 10-я месцы. Атрымліваецца, маленькая Літва бачыла мэту і ішла да яе па ўзрастальнай, а Беларусь тапталася на месцы. Як і літоўцы, беларусы зазналі дзве паразы ў папярэднім раўндзе, але саступалі літоўцам у розніцы мячоў – мінус 13 супраць мінус 7. Пры тым што Літва адмовілася ад пералёту і дабіралася ў Кошыцэ на першы матч супраць Расеі аўтобусам 15 гадзінаў – у той час як Беларусь, хоць і даючы кругаля праз Маскву і Вену, усё ж такі ляцела.
У выніку падчас гульняў беларусы дэманстравалі праблему з брамнікамі (усе трое рэпрэзентуюць берасьцейскі «Мяшкоў»), слабую канцэнтрацыю, змену схемаў ды яшчэ грубую гульню з выдаленнямі. У другім туры супраць Польшчы, напрыклад, замест брамніка выводзілі сёмага палявога гульца з пераходам на пазіцыю лінейных двух гандбалістаў. Але эфекту гэта не дало. Польшча трымала беларусаў на адлегласці 3–4 мячы, а за 11 хвілінаў да фінальнага свістка аддалілася на пяць. Далей – горш. Беларусы не маглі пераламаць хады гульні, далёка не заўсёды скарыстоўваючы атаку як галявую, нявымушана страчвалі мяч (усяго 13 за матч), і 27-ы гол польскі гандбаліст Міхал Дашэк (Michał Daszek) закідваў ужо ў пустую браму. Беларусь паплыла і ў выніку прагуляла цэлых дзевяць мячоў.
Наўрад ці ў гэтай разнашэрснай гульні нашай каманды вінаватыя станоўчыя тэсты на ковід Уладзіслава Куляша ды Івана Мацкевіча. У палякаў семярых гандбалістаў не дапусцілі да турніру, а выглядала польская каманда хоць і не надта мабільна, але надзейна. Польшча выйшла ў асноўны раўнд «Еўра» і заўтра ў Браціславе правядзе цікавы паводле перадстартавых разлікаў двубой за першае месца супраць Нямеччыны. А Беларусь, такім чынам, паказала найгоршы за сем апошніх сезонаў вынік на топ-турнірах і апусціцца ў фінальным падсумаванні як мінімум на 13-е месца. Усё высветліцца пасля апошняга туру, які будзе згуляны ў аўторак, 18 студзеня. Супрацьстаяць нашай дружыне будуць аўстрыйцы, якія таксама датэрмінова скончылі барацьбу за выхад у асноўны раўнд.
Літоўскі адмыслоўца Гінтарас Савукінас (Gintaras Savukynas) прадказваў, што самае высокае месца на сёлетнім чэмпіянаце кантыненту з постсавецкіх зборных зоймуць беларусы. А аказалася, што далей пойдзе Расея. Ва Украіны таксама турнір не склаўся, і «жоўта-блакітныя» на роўні з беларусамі – аўтсайдары сваёй групы з нулём пунктаў.
АП belsat.eu
