Абраная прэзідэнтка Беларусі Святлана Ціханоўская ў панядзелак, 18 верасня, возьме ўдзел у шэрагу мерапрыемстваў падчас сесіі Генеральнай асамблеі ААН у Нью-Ёрку. Пра гэта паведамляе Офіс Святланы Ціханоўскай.
На сесію Генеральнай асамблеі ААН збіраюцца лідары амаль усіх краінаў свету.
Як паведамляе Офіс Святланы Ціханоўскай, у яе запланаваныя сустрэчы з шэрагам міністраў замежных справаў і палітычных лідараў. Сярод іншага, запланаваная сустрэча з прэзідэнтам Гватэмалы, якая з’яўляецца пакупніком беларускіх калійных угнаенняў.
Акрамя таго Святлана Ціханоўская возьме ўдзел у цырымоніі ўручэння прэміі Атлантычнай рады «Global Citizen Awards», якую сёлета атрымае прэзідэнт Украіны Уладзімір Зяленскі.
Таксама лідарка дэмакратычных сілаў прыме ўдзел у дыскусіі па Беларусі, арганізаванай дэлегацыяй Еўразвязу пры ААН на тэму беларускай незалежнасці і суверэнітэту.
Таксама на тыдні высокага ўзроўню сесіі Генеральнай Асамблеі ААН плануе прысутнічаць беларуская дэлегацыя, якую ўзначаліць міністр замежных спраў Сяргей Алейнік.
Алена Рувіна belsat.eu
