У Петрыкаве на Гомельшчыне з’явіцца новы будынак раённага аддзелу ўнутраных справаў. На будаванне плануюць выдаткаваць $ 5 млн, гаворыцца ў конкурснай дакументацыі на сайце дзяржаўных закупаў. Выданне «Флагшток» мяркуе, што паляпшэнне ўмоваў працы мясцовых міліцыянтаў звязанае з пагрозаю пратэстаў працаўнікоў горнаўзбагачальнага камбінату.
Для новага будынку РАУС вылучылі тэрыторыю ў 1,63 гектара, а яго агульная плошча складзе амаль 3 тыс. квадратных метраў.
Там збяруць усе падраздзяленні: інспекцыю ў справах непаўналетніх, крымінальна-выканаўчую інспекцыю, аператыўна-дзяжурную службу, аддзел грамадзянства і міграцыі, ДАІ. Прадугледжаны таксама ізалятар часовага ўтрымання на 24 месцы і карцар. Яшчэ будзе музей, спартовая зала, зала для нарадаў.
На тэрыторыі РАУС з’явяцца гаражы, стаянкі для канфіскаванага транспарту, цір, пляц і спартовыя пляцоўкі.
На будаванне комплексу пойдзе Br 16,1 млн, паводле цяперашняга курсу – $ 5 млн.
«Флагшток» адзначае, што летась на Петрыкаўшчыне зафіксавалі самае істотнае скарачэнне ліку жыхароў сярод усіх раёнаў Гомельскай вобласці. Насельніцтва там паменела на 2,7 %. Таму з’яўленне «мега-РАУС» нельга растлумачыць росквітам рэгіёну.
«Прычынаю будавання новага РАУС мог стаць запуск у Петрыкаве горнаўзбагачальнага камбінату на 1719 працоўных месцаў. Як паказалі пратэсты 2020 года, маладыя працаўнікі прыбытковых прадпрыемстваў уяўляюць патэнцыйную небяспеку для рэжыму Лукашэнкі», – падсумоўвае выданне.
Раней у Гомлі на будаванне дзвюх грамадскіх прыбіральняў выдаткавалі $ 1,6 млн і $ 660 тыс. – на флагшток.
Сяргей Крот belsat.eu