Хакеры сцвярджаюць, што атрымалі дакументы і розныя звесткі кампаніі, якую лічаць «валютным цэхам» рэжыму Лукашэнкі.
У ноч на 16 жніўня невядомыя хакеры ўзламалі сайт кампаніі «Беларуськалій». На момант публікацыі Kali.by недасяжны, але сляды ўзлому бачныя ў кэшы Google.
Хакеры захавалі архіўную копію старонкі – там размясцілі ліст са зваротам да групаў супраціву і сілавікоў, расказалі пра нібыта створаны Аб’яднаны штаб супраціву, але не пакінулі кантактаў. Ліст падпісалі так: «Фідэль, АШС, Мінск, Інфармацыйная група».
Выглядае на тое, што суполка не звязаная з рухам «Супраціў» і «Кіберпартызанамі». Раней пра ўзломы АСШ расказваў іншы Telegram-канал, які часта робіць рэпосты са старонак Вольгі Карач.
Суполка «Алиса рассказывает» піша, што хакеры атрымалі дакументы і іншую інфармацыю «Беларуськалія», выклалі ў агульны доступ SSL-сертыфікаты сайта. Тлумачаць, што «Беларуськалій» – «валютны цэх» Беларусі, які рэжым Аляксандра Лукашэнкі выкарыстоўвае для «рашэння праблемаў за межамі Беларусі» і «карумпавання чыноўнікаў іншых краінаў».
Алесь Наваборскі belsat.eu
