Ілля Вайцяховіч, малодшы сын беларускага бізнесоўца Эдуарда Вайцяховіча, які памёр некалькімі днямі раней, ехаў на пахаванне бацькі з Рыгі і быў арыштаваны.
Супрацоўнікі ГУБАЗіК затрымалі яго на мяжы, паведамляе Reform.by.
Паведамляецца, што 14 студзеня Ілля Вайцяховіч спрабаваў уехаць у Беларусь. Яго доўга не адпускалі беларускія памежнікі, а потым прыехалі супрацоўнікі ГУБАЗіКу з Менску і адвезлі ў ізалятар на Акрэсціна.
«Учора Ілля ехаў на пахаванне бацькі з Рыгі. На мяжы доўга не ўпускалі, прыехаў праз 3 гадзіны ГУБАЗіК з Менску, затрыманы за прапаганду антыдзяржаўнай дзейнасці. Цяпер на Акрэсціна», – перадае Reform.by са спасылкай на знаёмых мужчыны.
Нагадаем, бізнесмен Эдуард Вайцяховіч памёр у ноч з 11 на 12 студзеня ва ўзросце 61 года. У 1995-м Вайцяховіч быў дэпутатам Вярхоўнага савета 13-га склікання, і ўжо тады выступаў супраць Лукашэнкі, пасля чаго пачаўся ціск на ягоны бізнес. У роднай вёсцы ў Мядзельскім раёне Эдуард ладзіў фестываль, таксама стварыў Цэнтр развіцця сельскага прадпрымальніцтва.
Пасля падзеяў жніўня 2020 года крама, якой валодаў Вайцяховіч, на некаторы час сышла ў страйк, а сам ён выказваўся супраць гвалту.
АД, belsat.eu