Нацыянальны статыстычны камітэт на сваім сайце паведаміў, што ў студзені – верасні сёлета рэальныя прыбыткі беларусаў выраслі на 5,8 % год да года. Гэтая тэндэнцыя захоўваецца з сакавіка.
На пачатку года беларусы бяднелі: у студзені і студзені – лютым рэальныя прыбыткі ўпалі год да года на 0,9 % і 1,1 % адпаведна. Пасля гэтага выплаты пайшлі ў рост.
За дзевяць месяцаў сёлета рэальныя прыбыткі павялічыліся на 5,8 %. Летась у параўнанні з 2021 годам яны скараціліся на 3,6 %, і цяперашнія паказнікі адштурхоўваюцца ад той нізкай базы.
Паводле звестак Белстату, у студзені – верасні сёлета грашовыя прыбыткі беларусаў на 87,3 % складаліся з заробкаў і трансфераў насельніцтву (так афіцыйна называюцца пенсіі, стыпендыі, грашовая дапамога). 8,2 % – прыбытак ад прадпрымальніцкай дзейнасці, прыбытак ад уласнасці – 4,5 %.
Рэальныя прыбыткі – грошы, што застаюцца на руках пасля выплаты падаткаў і ўнёскаў і ўлічваюць інфляцыю.
Сцяпан Кубік belsat.eu
